FRETILIN Apoiu Xanana Luta Ba Fonteira Marítima

DILI, (ANTIL) – Prezidenti eleitu partidu Frente Revolusionariu Timor-Leste Independente (FRETILIN), Francisco Gutteres Lu-Olo deklara partidu FRETILIN sei fó apoiu tomak ba Xefi Negosiadór Prinsipál ba kazu fronteira marítima, Kay Rala Xanana Gusmão hodi defende direitu Timor maske Austrália kontinua laiha sentimentu.

“FRETILIN fó apóiu tomak ba Kay Rala Xanana Gusmão atu lidera negósiasaun fronteira marítima Timor-Leste hasoru Austrália”, Lu-Olo ba ANTIL foin lalais ne’e relasiona ho deklarasaun Kay Rala Xanana Gusmão katak, luta hasoru Austrália sei naruk.

Lu-Olo realsa, FRETILIN kontinua akompaña nafatin prosesu Conciliatória Compulsiva ne’ebé hala’o daudaun liu-hosi konsiliadores TL no Austrália.

FRETILIN tuir Lu-Olo iha kazu luta hasoru Austrália sei defende metin TL nia soberania nasionál liu-hosi respeita prinsípius no regras konstitusionais iha planu internu mak hametin orgaun soberania nasionál hola kna’ar no kompeténsia sira tuir konstituisaun RDTL.

Aleinde ida ne’e FRETILIN mós ezije respeita, observa, defende no hakat tuir prinsípiu no regras direitu internasionál.

Antes ne’e Kay Rala Xanana Gusmão dehan, governu Austrália laiha sentimentu tanba, sira konsidera-án hanesan nasaun ne’ebé mak boot, avansadu no ukun-án tinan barak ona tanba ne’e, prosesu luta ba defende fronteira marítima sei naruk.

“Austrália kuandu nafatin laiha mo’e mak ita mós sei la-para luta kontra ba ita nia soberania tasi Timor”, Xanana Gusmão afirma pozisaun TL. (jornalista: Manuel Pinto; editora: Rita Almeida)