CNRT, XANANA NIA OBRA, SEI LA FAHE BA GRUPU 2

Polemika angariasaun fundus ne’ebe deskonfia involve Francisco Kalbuadi Lay ho Jacinto Rigoberto, sei la lori implikasaun boot ba partidu CNRT atu fahe malu, tanba  CNRT ne’e la’os ema ida ka rua nian, maibe CNRT ne’e Xanana nia obra.

Ho nune’e hirak ne’ebe ba servi no defende CNRT la’os tuir sira nia hakarak no gostu,  maibe tuir orientasaun politika no orientasaun husi eis Komandante Em Xefi das FALINTIL, Kay Rala Xanana Gusmão. Basa, Xanana duni maka halibur ema hotu iha CNRT. Tanba ne’e, la iha dalan atu ema sira ba iha CNRT atu fahe malu tanba deit kadeira no poder. Mesmu natureza polemika kazu angariasaun fundus ne’ebe hala’o iha tinan 2012 ne’e mosu fali iha publiku despoi tinan hat nia laran liu ona, la signifika iha itensaun politika atu hadau malu poder, tanba hirak ne’ebe iha CNRT hakarak deit maka asegura interese nasional no mehi boot prezidenti CNRT, Kay Rala Xanana Gusmão nian, katak, liberta patria no liberta povu husi kiak.

“Mehi hamutuk, mehi povu nia mehi” no “fiar an la’o ba oin.” Ne’e maka sai nafatin instrumentu fundamental ne’ebe emar sira CNRT tenke asegura to’o rohan.

Prezidente bankada CNRT iha Parlamentu Nasional (PN), Natalino dos Santos, reafirma katak, polemika angariasaun fundus la fahe CNRT ba kubu (grupu) rua (2). Infleismente, iha CNRT nia laran iha deit maka orgaun rua (2), ida maka Comisaun Politika Nasional (CPN) neebe kompostu husi Presidente na kualidade presidente CPN, Presidente de partidu, Vise Presidente, Sekertaria Jeral, Adjuntu sekertari Jeral ho Presidente Comissaun Diretiva Nasional (CDN), sira ne’e maka hola parte iha CPN.

“CDN ne’e membru 65 nebe orgaun dileberativu hanesan iha FRETILIN karik dehan Comite Central, sira atu trata, halo avaliasaun, isu sira hanesan ne’e sira maka godok, tanba sa maka hasoru problema, sira godok hotu depois sujere ba CPN atu tetu depois foti desisaun, nebe laiha kubu rua, se maka dehan iha kubu rua, normalmente ema dehan ami iha kubu rua, CNRT laiha kubu rua, CNRT iha ida deit ho nia moto maka fiar an lao ba oin,” esplika Presidente Bankada CNRT, Natalino dos Santos, hodi responde jornalista sira  iha PN, Kinta (13/10/2016).

Nia dehan tan diferensia ideas iha nebe deit, iha partidu iha mundo universalmenta vaksaun ne’e normal, tenki iha diferensia idea para bele kria balansu demokrasia, se hotu hotu hanoin ida deit demokrasia la lao ona.

Wainhira husu kona ba kazu angariasaun nebe tuir lolos kaduka ona maibe kontinua levanta, karik ida ne’e tanba hadau malu ba posisaun Sekertariu Jeral CNRT nian, Natalino esklarese katak, kazu ne’e Tribunal maka notifika tanba sa maka ema iha CNRT hadau malu halo fali tanba CNRT laiha Tribunal iha neba.

“Ema halo konfujaun ne’e iha ne’e, agora Tribunal maka notifika, Tribunal, Prokurador Jeral akuza dadaun ema CNRT agora ami CNRT mak akuza malu fali, ne’e laiha, ne’e bosok, problema ne’e ita hare iha 2012, transmisaun direita, transparensia, buat hotu – hotu, publiku sira hatene sese maka fo osan iha altura neba, iha partidu barak halo angariasaun hanesan hotu, iha balun taka an lolos taka an ne’e maka Prokurador sira halo despaisu atu halo investigasaun ba sira ne’e, mais ami nia CNRT ne’e transparensia, loke ba publik, transmisaun direita, ema sira fo ne’e mos hatene naran, osan sira hatete hotu,” hatete Natalino.

Despaisu husi eis Prokuradora Geral Republika (PGR), Ana Pessoa Pinto nian sai iha loron 16 fulan Maiu 2012, bazeia ba informasaun nebe fo sai iha media. Nune’e, Ana Pessoa ordena kedas para halo investigasaun.

“ami laiha problema, ami solidu, ami iha disiplina partidu, ami obdese ba ami nia irarkia, ami obdese ba ami nia lideransa, tanba ami forte maka iha tinan 5 deit bele hetan 30 kadeira tanba ami rona malu, respeita malu, diferensia idea ne’e normal, se maka dehan ami iha problema ne’e entaun nia hakarak halo defamasaun ba ami nia partidu, ami nia partidu ne’e organizadu, orientadu i struturadu husi maun bo’ot tun to’o kraik to’o SELCOM,” afirma Natalino.nes

Jornal Nacional