sábado, 15 de outubro de 2016

PM hato’o agradesimentu ba António Guterres relasiona ho apoiu ne’ebé nia fó mai Timor-Leste


Primeiru-ministru Rui Maria de Araújo, hato’o agradesimentu ba sekretáriu-jerál ONU foun, António Guterres, tanba sempre fó apoiu ba problema Timor-Leste nian, hodi haktuir hikas kona-ba kompromisu nasaun nian ba iha sistema multilaterál internasionál. 

Iha karta ne’ebé haruka ba António Guterres horisehik, iha duni loron ba ninia eleisaun iha Asembleia Jerál ONU hanesan sekretáriu jerál foun, Rui Araújo hato’o parabéns ba governannte portugés, relasiona ho ninia eleisaun.

“Lasu istóriku ne’ebé kria uniaun entre Timor-Leste ho Portugal nomós papel determinante ne’ebé vossa eselénsia asumi ba afirmasaun hosi ami-ninia autodeterminasaun, tenke hetan duni atensaun maka’as hosi timor-oan hirak ne’ebé, desde inisiu, akompaña ona prosesu ne’ebé fó rezultadu ho rekomendasaun ba aklamasaun Konsellu Seguransa ba Asembleia Jerál nian nomós ba aprovasaun hosi órgaun Organizasaun Nasoins Unidas”, tuir saida maka hakerek iha karta ne’ebé Lusa hetan asesu ba.

“Ha’u mos aprovieta hato’o ami-ninia sinseru agradesimentu ba amizade no apoiu ne’ebé nia fó beibeik ba ami-nia povu no ami-nia nasaun, hein katak ida ne’e bele sai hanesan motive orgullu ida ba vossa eselénsia, tanba ohin loron ami konsege moris mesak ka sai duni pvou ida hodi goza ninia direitu, liberdade no garantia nu’udar nasaun independente”, nia hakerek.

Tuir xefe Governu, prosesu eleisaun ne’e “markante tebes, tanba transparente, hodi sobresai hosi valór hirak ne’ebé umanista liu (…), aumenta nivel diplomasia no pragmatismu” hosi eis-altu komisáriu ONU ba Refujiadu sira.

Rui Araújo haktuir hikas kona-ba empeñu Timor-Leste nian, ba iha sistema multilaterál internasionál nomós ninia kompromisu ba ajenda 2030 ho Objetivu ba Dezenvolvimentu Sustentável (ODS), mantén ninia asaun liu hosi G7+, grupu ida hosi nasaun frájil 20 no ne’ebé afeta tanba konflitu.

António Guterres, ne’ebé uluk hanesan eis-primeiru ministru Portugal nomós eis-altu komisáriu Nasoins Unidas ba Refujiadu sira, hahú iha 1-janeiru-2017, sei asumi knar nu’udar 9.º sekretáriu jerál ONU nia ho mandatu tinan lima, hodi troka Ban Ki-moon.

“Ohin, ha’u aprezenta ho gratidaun no umildade nomós ho responsabilidade bot ”, tenik sekretáriu jerál ONU foun, António Guterres, iha ninia deklarasaun dahuluk hafoin hetan aklamasaun hosi Asembleia jerál ONU nian.

Nasaun membru Nasoins Unidas 193 maka horisehik, ratifika iha Asembleia Jerál, ba aklamasaun, hodi hilli António Guterres, sai lideransa ba organizasaun, iha 5-outubru ne’e hosi orgaun desizóriu prinsipál ONU nian, Konsellu Seguransa.

SAPO TL ho Lusa 

Sem comentários: