PR Taur Lansa Primeira Pedra Konstrusaun Monumentu Masakre Santa Cruz

DILI, (ANTIL) - Prezidente Repúblika (PR), Taur Matan Ruak maka sei lansa primeira pedra ba konstrusaun  Monumentu Masakre Santa Cruz 1991, Sabadu (12/11) iha simiteriu Santa Cruz, Dili, Prezidente Komité 12 Novembru, Gregório Saldanha informa ba jornalista sira, Kinta (10/11), hafoin hasoru malu ho Prezidente Repúblika, Taur Matan Ruak iha Palasiu Prezidente Dili.

Iha enkontru ne’e, partisipa mos Sekretáriu Estadu Juventude no Desportu, Leovigildo Hornai, hodi hato’o kona-ba preparasaun ikus selebrasaun masakre Santa Cruz ba dala 25, hanesan mos selebra Loron Nasional ba Juventude, inklui preparasaun ikus serimonia hatur fatuk ba konstrusaun monumentu ne’e.

“Ami hatama ona dezeñu ba iha Governu. Ami konsulta ho Primeiru Ministru, Dr. Rui Maria de Araújo, Ministru Planeamentu Estratéjiku, Xanana Gusmão no Sekretáriu Jerál Partidu FRETILIN no Dr. Marí Alkatiri. No deside  lansa  konstrusaun  monumentu iha komemorasaun Masakre Santa Cruz 1991,” Gregório dehan.

Konstrusaun ba monumentu ne’e la’o fazeadamente. Faze dahuluk, hadi’a kapela, harii estátua iha portaun boot nia leten no hadi’a dalan tama ba iha kapela. Faze daruak no datoluk, sei deskuti maka bele konstrui tan buat boot balun. Kustu orsamentu ba monumentu ne’e seidauk difini loloos.

Nia rekunese, konstrusaun monumentu sei fó implikasaun ba komunidade sira, ne’ebé hela besik Semitériu Santa Cruz. “Dili ne’e kloot loos, tan ne’e presiza iha planu mestre para marka populasaun sira hela iha ne’ebé no fatin memória ne’e atu konstrui iha ne’ebé,” Gregório haklaken.

Kona-ba lala´ok komemorasaun Masakre Santa Cruz, nia esklarese, komemorasaun tinan ida-ne´e diferente ho tinan sira seluk. Tanba komemorasaun ba Masakre Santa Cruz,  hala’o hosi munisípiu to’o suku sira no sei lansa mós Rádiu Komité 12 Novembru.

“Ami informa ba Xefe Estadu, katak, halo ona preparasaun ba Komemorasaun 12 Novembru Masakre Santa Cruz. Konvida mós Prezidente atu partisipa iha eventu ne’e,” Gregório tenik. Orsamentu ba komemorasaun ne´e mai hosi Sekretaria Estadu Juventude no Desportu ho montante $121,000.00. Fundu balkn se buka husi  fonte seluk, atu suporta atividade adisionál sira. (Jornalista: Xisto Freitas/Editor: Otelio Ote)

Foto: Prezidente Komité 12 Novembru, Gregório Saldanha ko´alia ba jornalista sira iha Palásiu Prezidésnia Repúblika hafoin sorumutu ho Prezidente Repúblika, Taur Matan Ruak. Iha dadalia ho jornalista sira, Prezidente Komité hetan akompaña hosi Sekretáriu Estadu Juventude no Desportu, Leovigildo Hornai. Foto ANTIL/Xisto Freitas