AJTL-TLPU Ezije Fó Sansaun ba Oknum PNTL ho F-FDTL Baku Jornalista

DILI: Asosiasaun Jornalista Timor Lorosa’e (AJTL) no Timor-Leste Press Union (TLPU) ezije ba Komandante Jerál PNTL no mós F-FDTL, atu fó sansaun ba oknum hosi institusaun rua ne'e, ne'ebé foin lalais baku jornalista iha Suai, Munisípiu Covalima.

Sekretariu Jerál TLPU, Manuel Pinto liuhosi konferensia imprensa konjuta iha Sede AJTL, Fatuhada, Dili, Kinta (10/11) hatete, Jornalista Martinho Moniz hosi média online www.tafara.org iha momentu ne’eba, hala'o hela kobertura eleisaun suku iha Aldeia Kaikoli, Suku Maudemo, Tilomar, Munisípiu Covalima.

“Tan de'it jornalista refere hasai foto uza telemovel, bainhira membru F-FDTL ho PNTL halo hela atuasaun ba grupu deskoñesidu ne'ebé hakarak estraga prosesu eleisaun, jornalista ne'e hetan baku no tortura,” Pinto afirma.

Iha fatin hanesan, Vise Prezidente AJTL, Zevonia Vieira hatete, iha fulan Agostu liubá, bainhira asiste seremonia aniversariu média online www.tafara.org, Komandante Jerál PNTL, Komisáriu Julio Hornay rasik afirma atu fó sansaun ba membru PNTL, ne'ebé baku jornalista hosi Jornal Business Timor.

“Maibé, liu de'it fulan rua asaun hanesan akontese tan ba jornalista hosi média online www.tafara.org. Ida ne'e, hatudu buat ne'ebé ladi'ak. Tanba, bele mosu interpretasaun katak PNTL tauk jornalista sira atu loke sira nia frakeza,” Zevonia dehan.

Bazeia ba faktu, AJTL ho TLPU nu'udar mahon ba jornalista Timór oan hotu-hotu, lamenta tebes no kondena hahalok oknum membru PNTL ho F-FDTL, ne'ebé halo asaun violentu hasoru jornalista ne'ebé hala’o hela nia servisu.

“Aktu violentu ne'e, nu'udar hahalok taka dalan ba servisu média nian no direitu públiku nia atu hetan informasaun. Tuir Lei Komunikasaun Sosiál, artigu 41, hahalok hanesan ne'e, nu’udar atentadu ba Liberdade Informasaun no sei hetan kastigu ho pena prizaun tinan 2.”

AJTL ho TLPU mós ezije ba instituisaun PNTL ho F-FDTL atu respeita servisu jornalista nian iha fatin publiku no mós iha servisu fatin. Tanba, papel média mós importante nu'udar ponte informasaun ba públiku.

"Halo investigasaun kle'an ba kazu refere no fó sansaun disiplinar ba membru PNTL no F-FDTL, ne'ebe komete agresaun fiziku hasoru jornalista," Pinto afirma tan.

Entertantu, jornalista Martinho Moniz haruka ona keisa ida ba Komandu PNTL liuhosi Servisu Investigasaun Kriminal Nasionál (SIKN), maibe to'o agora laiha rezultadu.

"Sira dehan ba hau atu hein deit mak sira kontaktu mais to'o agora, ohin loron ema ruma seidauk kontaktu hau," nia dehan. (*)

Ola Timor – Chay -  Editór: Alexandre Assis

Foto: BAKU JORNALISTA - AJTL-TLPU, Kinta (10/11) hala'o konferensia imprensa konjunta kona-ba kazu oknum membru PNTL no F-FDTL baku jornalista hosi média online www.tafara.org ne'ebé akontese iha Suai, 29 Outubru 2016. (Olatimornews Foto/Chay)