XANANA GUSMÃO APOIA LU-OLO BA PR

Prezidenti Partidu CNRT, Kay Rala Xanana Gusmão, fó apoiu tomak ba Prezidenti Partidu FRETILIN, Francisco Guterres “Lu-Olo” ne’ebe kandidata-an ona atu kompete iha eleisaun prezidensial ba kargu Prezidenti da Repúblika (PR).

Prezidenti Republika (PR), Taur Matan Ruak rasik dekreta ona atu eleisaun Prezidensial 2017 sei hala’o iha 20 Marsu mai ne’e. Ho nune’e, mosu ona figura kandidatu Prezidenti Republika lubuk ida, kompostu husi Francisco Guterres “Lu Olo”, Jose das Neves “Samala-rua”, Antonio  Maher Lopez “Fatuk Mutin”, Flavio Pereira husi Partidu Parentil ho mos Angela Freitas husi partidu TRABALHISTA.

Iha mos figura potensial ne’ebe naran temi hela atu kandidatu-an, maibe sei iha hela faze negosiasaun no preparasaun. Figura sira ne’e maka hanesan Jose Luis Guterres “Lugu” atual Prezidenti partidu FRENTI-MUDANCA, ho mos Laureadu Nobel da Paz 1996, Jose Ramos Horta.

Prezidenti partidu CNRT, Kay Rala Xanana Gusmão, fundamenta katak, partidu CNRT seidauk iha ninia kandidatu ba eleisaun Prezidensial 2017.

“Ami la iha kandidatu ba prezidenti husi partidu CNRT, maibe atu dehan karik se iha kandidatu ruma ha’u sei apoiu, maibe lista iha tiha mak ha’u bele hatene katak se mak kandidata-an, maibe hanesan desizaun pesoal. Iha ha’u nia alin ida, ne’e maka Dr. Lu-Olo, mas desizaun partidu nian iha kongresu mak ami sei koalia,”  hateten Xanana Gusmão, hodi responde jornalista sira iha Aeroportu Internasional Prezidenti Nicolau Lobato Comoro-Díli, Segunda (23/01/2017), hafoin fila husi vizita ba estranjeiru.

Kona ba informasaun ne’ebe hataten katak, nia (Xanana-red) hasoru malu ona ho eis PR Jose Ramos Horta iha Singapura hodi afirma ninia pozisaun apoia kandidatura Ramos Horta nian,  Xanana responde dehan, informasaun ne’e la los.

“Ha’u atu dehan katak informasaun ne’e bosok. Ha’u la hasoru malu ho eis Prezidenti Republika, Jose Ramos Horta, hau ba serbisu Estado nian, maibe hau hatene nia iha ne’eba nia ba halo pidato iha  seremonia ida besik ami hela ba ne’e, maibe hau la hasoru nia (Horta-red),” hateten Xanana Gusmão.

Xanana lia tun mós dehan, “ha’u serbisu la iha ka, ne’ebe ha’u ba fali apoia nia (Horta-red), ita hatene ona katak kuandu ita pertense ona iha partidu ida ne’e partidu mak desidi, la’os ha’u nian ketak partidu nian ketak fali ne’e ita nia ulun fatuk”. mia

Jornal Nacional