KRÍTIKA SISTEMA HNGV, DIRETOR HNGV FÓ PRIMEIRU SAMADA BA MÉDIKU

Médiku sira ne’ebé hala’o kna’ar iha Hospital Nacional Guido Valadares (HNGV) sorte aat, tanba hetan primeiru samada atensaun husi Diretor Ezekutivu HNGV, José António  Gusmão alias Zeto. Tanba médiku sira ne’e lansa krítika hasoru sistema HNGV ne’ebé la’o ladun di’ak.

Médiku sira ne’ebé hetan primeiru samada atensaun husi Diretor HNGV ne’e, tanba lansa krítika hasoru HNGV nia sistema liu husi Media Sosial ho  sira-nia grupu naran ‘Grupu Emergensia HNGV’.

Dotor no enfermeiru ne’ebé hetan samada antensaun ne’e mak hanesan Dotor  Espesialista Cardialogia (Fuan) Dotor Andre Almeida da Cruz Monteiro, Dotor Nilton Piedade Tilman, Dotor Gustavo Cruz Coreia, Enfermeiru Gil Fereira Ximenes.

“Iha lei  Funsaun Publika ne’e iha pena ba lei ida naran turno ne’e iha, depois lei turno ne’e sira aprova depois aplikasaun ne’e aplika hotu ona no dehan ami tenkiser hala’o ne’e mak ami hala’o tiha ona. Maibe ha’u  no mos kolega sira ne’ebé mak servisu iha HNGV servisu iha tinan kotuk, osan ida turno nian ne’e la sai, balun fulan 8 no balun fali to’o tinan tan ona mos la sai, no la’os ami enfermeiru sira nian deit mak la sai, maibe Dotor sira nian mos la sai”. Enfermeiru Gil Fereira Ximenes ba Jornal Nacional Diário, via telefone, Kinta (19/1/2017.

Nia hatutan osan turno nian lasai besik tinan ida ona nee mak nia hakerek iha media sosial atu ema asesu. Nunee mos lia fuan sira nee la hakerek at ema ida.

Lia fuan nebe nia hakerek mak,  “ ba maluk infermeiru no infermeira, parteira no teknika administrasaun sira ne’ebé mak iha HNGV, imi nia hanoin ne’e oinsa  lei funsaun publika kona ba turno, ita implementa ona, no ita hala’o tiha ona, tamba saida mak osan turno ne’e besik fulan lima atu ba fulan 6 i balu to’o fulan 8  ona seidauk sai, ne’e tanba saida? Mai ita hamutuk husu lei nain sira ou ita ba husu took prokurador sira tanba boot sira iha HNGV ne’e viola ita nia direitu. Ha’u hakerek deit hanesan ne’e, nune’e kolega Dr.  Balun kometar aumenta, ida ne’e mak ami hetan samada atensaun ona ne’e,” dehan enfermeiru Gil Fereira Ximenes.

Gil Fereira Ximenes haktuir, iha nia posting status nia la hasai liafuan aat ka trata ema ruma, tamba nu’udar pesoal saude ne’ebé hala’o ona nia knaar no kompetensia maibe seidauk hetan nia direitu, tanba ne’e nia hakarak husu ba lei nain sira ne’ebé hakerek lei no implementa maibe nufin la halo tuir.

“Lolos ne’e sira husu lai ami tamba saida mak ami posting ida ne’e, maibe sira la husu, sira koalia fali dehan tanba Ministra, Vise Ministra mak  fo diretor ezekutivu HNGV ne’e atu fo samada atensaun mai ami. Maibe samada atensaun ida ne’e halo la’os nia (Diretor) mak mai hasoru ami, maibe liu fali husi Diretor ka Administrador Lojistika ka Finansas mak bolu fali ami no ha’u kolia dehan ha’u mak hakerek duni,”dehan Gil Fereira Ximenes.

Maske nune’e nia ho nia kolega nain tolu ne’ebé hetan samada atensaun refere sei halo karta resposta ba to’o iha Primeiru Ministru  (PM) Rui Maria de Araújo, tamba  tuir sira-nia estatus ne’ebé posting iha media sosial ne’e  nu’udar sentimentu lamentasaun.

Tuir nia, antes ne’e Diretor Ezekutivu rasik  halo estatus  trata  pesoal saude sira no posting foto barak-barak iha  media sosial, maibe ema ida nunka kestiona tanba saida mak sira foin koalia deit ida ne’e Diretor kestiona maka’as hodi fo kedas presaun.

“Ha’u lamenta tebes tanba laiha lei ida atu bandu ema asesu media sosial, nia rasik Diretor Ezekutivu halo estatus tau  ema nia foto bara-barak iha media maibe no fim ema fo komentariu nia hapus tutuir tia ida ne’e signifika katak nia duni mak loke dalan hodi ami tuir,” Gil Fereira Ximenes.

Liafuan hanesan mos hato’o husi Dotor Gustavo Cruz Coreia, katak, liafuan ne’ebé nia kolega enfermeiru Gil Fereira Ximenes hakerek ka posting hodi sira hotu komentariu tutuir malu ne’e, la’os liafuan ida ne’ebé mak aat. Maibe hanesan liafuan lamentasaun ne’ebé osan over time ninian ne’ebé lolos sira hetan, balun kuaze fulan 5 atu ba 6 no balun kuaje fulan 8 to’o tinan ida mos seidauk hetan.

“Lolos ne’e ami la koalia liafuan aat ka trata ema, maibe nu’udar humanu ne’ebé sente nia direitu viola entaun ami fo sai. Mas ba ha’u koment deit kolega  ne’e nia estatus hodi dehan deit se hanesan ne’e ita mos servisu tama oras tuku 8 sai tuku lima, ah ida ne’e deit mak ladiak ona,”Dotor Gustavo Cruz Coreia hatete.

Wainhira Jornalista husi JN-Diário tenta atu konfirma ho Diretor Ezekutivu HNGV iha nia servisu fatin HNGV Bidau-Díli, maibé laiha fatin.ola/ety

Jornal Nacional