Alkatiri: Kalma De'it Buat Hotu Sei La’o Di'ak

DILI: Sekretáriu Jerál Partidu FRETILIN, Mari Alkatiri, lakohi komenta ba pozisaun partidu CNRT nian, tanba ne’e manajementu partidu ida-idak nian.

Maski nune’e, partidu FRETILIN to’o oras ne’e sei mantein kalma tanba fiar katak, buat hotu-hotu sei la’o diak no tuir ninia dalan.

“Kalma de’it buat hotu sei la’o di'ak”, dehan Sekretáriu Jerál FRETILIN, Mari Alkatiri, via telefone, horisehik.

Nune’e, partidu FRETILIN iha planu atu halo soru-mutu ho partidu polítiku sira kona-ba formasaun governu nian, maibé seidauk bele divulga sai tanba sei hein informasaun ofisial husi parte Comité Central FRETILIN (CCF) nian.

Antes ne’e, liu husi komunikadu ne’ebé fó sai husi partidu FRETILIN hateten, haree husi rezultadu eleisaun nian povu hakarak hakle'an liután entendimentu insidénsia parlamentár ne’ebé hahú husi 2012/2013 ho konsekuénsia formasaun VI Governu Konstitusionál iha kontestu entendimentu entre CNRT/Bloku Koligasaun ho FRETILIN.

Nune’e, estabilidade tenke habelar mós ba relasaun entre Órgaun Soberania hotu-hotu, liuliu ba Prezidensiál Repúblika iha ninian relasaun ho Parlamentu Nasionál no ho Governu.

Ba Parlamentu Nasionál hanoin katak, tenke fó mós kbiit foun no sei lori mós preokupasaun no aspirasaun oioin liuhusi PLP no KHUNTO.

Nune’e, PD konsege mantein nafatin nia pozisaun iha PN, no ida ne’e hatudu katak partidu ida ne’e iha votante metin no ita tenke konsidera nafatin sira nu'udar partidu ida ne'ebé merese konsiderasaun.

Nune’e, iha senáriu foun ida ho variavel foun. Tanba ne’e, importante ba atu hetan denominadór komún ida. Ida ne’e mak sai dezafiu hodi hotu-hotu presiza hamutuk atu hasoru.

Independente