Austrália oferese ajuda ba Filipina iha luta kontra grupu estremista Estadu Islámiku

Austrália oferese ajuda iha área asesoria no kapasitasaun militar ba Filipina relasionadu ho kombate hasoru grupu estremista Estadu Islámiku (EI) iha súl nasaun nian, deklara hosi ministra Negósiu Estranjeiru, Julie Bishop, iha loron-tersa ne'e.

"Forsa armada sira Filipina nian besik hahú luta todan ida hasoru EI. Ami oferese hodi ajuda iha área ne'ebé maka ami bele kontribui ba posibilidade hodi manán aflisaun iha súl Filipina nian", Julie Bishop hatete ba 'media' lokal sira.

Maibé, xefe diplomasia australianu, ne'ebé oferese ona asisténsia ba Prezidente Filipina nian, Rodrigo Duterte, durante vizita ida ba Manila ne'ebé halo iha fulan ne'e, afirma ona katak apoiu ne'e sei hanesan ho apoiu ne'ebé fó ba Irake ne'ebé maka iha "asesoria, asisténsia ho kapasitasaun".

"Ne'e la inklui tropa sira iha rai laran", nia hatutan.

Austrália haruka ona aviaun rekoñesimentu no vijilánsia P3 Orion rua hodi tulun Filipina ne'ebé, hahú fulan-Maiu, kombate estremista sira Maute, ne'ebé iha ligasaun ho autoproklamadu Estadu Islámiku, ne'ebé iha baze iha sidade Marawi, iha súl nasaun nian.

Kombate sira, ne'ebé iha loron-kuarta tama iha loron 100, halo ona pelumenus ema na'in 735 mate no ema besik millaun ida sai deslokadu.

Iha semana liubá, primeiru-ministru australianu, Malcolm Turnbull, afirma ona katak hanesan "importante tebes" halakon EI iha Marawi hodi evita atu sidade konverte hanesan Raqa sudeste aziátiku nian, ho referénsia ba sidade hosi norte Síria nian ne'ebé konsidera hanesan baze hosi EI nian iha nasaun.

SAPO TL ho Lusa