MS Halo Revizaun Ba Planu Estrategiku Nasional Saude

Ministerio Saude (MS) ho parseirus halo revizaun ba iha planu estrategiku nasional saude, tanba programa barak mak nia implementasuan la tuir ona planu.

Diretora Jeral Prestasaun Servisu MS, doutora Odete Viegas hateten planu estrategiku hanesan matadalan ida ba ministerio no parseirus atu la’o tuir hodi fo prestasaun servisu ne’ebe diak ba populasaun, maibe kuandu la kondis ona ho realidade tenke halo revizaun.

“Iha planu ne’e hakerek, iha ospital regional sira ita tenke prienxe mais 150 kamas, maibe realidade ita prienxe deit 24 kamas no iha programa balun ne’ebe presiza haree no hadia fali,” nia hateten, iha salaun MS Kaikoli, Dili.

Alende ne’e, iha mos patraun infra-estrukturas balun ne’ebe seidauk bele kondis ho kapasidade ministerio nian.

Nia dehan, iha mos dezafiu ne’ebe ministerio hasoru mak limitasaun rekursus humanus iha diresaun no programasaun sira hodi implementa programa iha baze.

“Ami komesa halo mapamentu ba iha rekursus humanus iha nivel nasional to’o munisipio hodi prienxe fatin hirak ne’e hala’o servisu,” nia hatutan.

Nia hatutan, ministerio mos halo ona kooperasaun ho nasaun sira hanesan Cina, Filipina, Indonesia no Australia hodi fo oportunidade ba Timor oan sira hasai kursu iha sira nia rain.

Entretantu, Diretor Saude munisipio Ermera, doutor Herculano Seixas dos Santos hateten revizaun ne’e pertenente tebes atu konsolida fali esforsu ne’ebe ministerio presiza halo hodi atinji vizaun ministerio nian ne’ebe defini ona iha planu estrategiku nasional 2030.

Nia dehan, iha oportunidade ne’e dirijente saude nivel nasional no munisipal sira hamutuk ho parseirus diskute klean liu kona ba programa no servisus atendimentu ne’ebe presiza hadia no haforsa iha tinan lima oin mai.

“Konesementu komunidade nian kona ba saude sei menus tebes, ne’e esforsu ne’ebe tenke kontinua, nia hateten.

Nia mos, preokupa tanba iha komunidade barak mak sei fiar liu ba tradisional hodi demora tempu to’o iha fasilidade saude, moras komplikadu ona e pesoal saude sira labele halo buat ida.

Nia hatutan, servisus ne’ebe saude munisipio tenke kontinua mak hasa’e kobertura ba atendimentu liu husi haforsa servisu outreach nian hanesan mobile clinic, Servisu Integradu Saude Comunitaria (SISCa) tanba komunidade barak hela iha foho.

Paulina Quintão | The Dili Weekly