Negosiante Indonesia Iha Kampung Alor Hamutuk 203

Dili - Negosiante Estranjeirus husi nasaun vinzinhus Indonesia sira neebe halao aktividade negosiu hanesan faan ropa ho sasan materiais dapur iha Kampu Alor, Suku Kampung Alor, Munisipiu Don Aleixo Dili total hamutuk 203.

Tuir Xefe Suku Kampung Alor, Alcina Carvalho dos Santos, negosiante Indonesia sira neebe halao sira nia negosiu iha Area Suku Kampung Alor liuliu iha Aldeia 01 total hamutuk atusrua tolu (203).

“Hau sente sasan neebe sira faan hanesan ropa, sapatu, nomos sasan materias dapur nian bikan, kanuru, sana, tasu no buat seluk-seluk tan,” katak Alcina ba STL iha Sede Suku Kampung Alor, Sesta (8/9/2017).

Nunee mos atu identifika lolos sidadaun estranjeirus sira nee iha Suku Kampung Alor husi atoridade Kampung Alor iha ona planu atu prepara visa de familia ba sira. Atu nunee bele hatene no data liuliu kona-ba ema hirak mak iha sira nia familia laran. Nomos bele hatene fen ho laen nee nain hira, labrik hira no joven hira.

Selae sira mai lori kedas sira nia ema mak sai fali sira nia karyawan.

Kona-ba sira nian suporta, katak Alcina, negosiantes Indonesia sira nee mos sempre fo apoio iha kualker eventu saida deit mak komunidade Kampung Alor halao liuliu hanesan iha loron inportante exemplu 20 de Maio, 12 de Novembru, 30 de Agostu nomos iha loron boot sira seluk tan nee sira sempre fo apoio hela deit.

Neebe sira nian prejenza iha Kampung Alor durante nee lao normal laiha ameasas ba sira tanba, joven sira iha nee ho negosiantes Indonesia haree malu diak. Parte seluk husi ami autoriadade lokal mos garantia tebes buat hotu sei lao ho diak.

Xefe Aldeia 01 Estela Aleixo hatutan maluk negosiantes Indonesia sira iha nee sira halao sira nia negosiu ho diak tebes tanba negosiantes sira nee ho joventude no komunidade sira sempre servisu hamutu hodi ajuda malu neebe laiha ameasas ba malu.

Planu nebe mak ami atu halo hanesan halo Visa familia ba negosiante Indonesia sira nee iha ona, planu ida nee inportante tebes tanba bele hodi hatene sira total hirak mak mai halo negosiu iha Suku Kampung Alor.

Iha fatin hanesan Hermansia Amir nuudar Negosiantes Indonesia hateten, sira halao negosiu iha Timor-Leste liuliu iha Kampung Alor halo tinan sanulu liu ona. Maibe durante halo atividade negosiu sempre halao ho diak.

Tanba sempre kolabora hamutuk ho autoridade Munisipiu Dili liu husi Lider komunitariu Suku Kampung Alor inklui servisu hamutuk ho komunidade sira rasik. Tanba nee sira sente lasiha frustasaun durante halao atividade negosiu iha Timor-Leste.

EST 3 | Suara Timor Lorosae