Ofisiálmente KI Loke Rejistu Órgaun Komunikasaun Sosiál

DILI (TATOLI) – Konsellu Imprensa (CI-Sigla Portugés) loke ofisiálmente simu rejistrasaun hosi órgaun komunikasaun sosiál tantu média imprime no eletrónika.

“Konsellu Imprensa (KI) ofisiálmente hato’o ba proprietáriu órgaun komunikasaun sosiál no meiu komunikasaun sosiál atu bele hahú ona prosesu rejistu tuir lei komunikasaun sosiál hateten,” informa Prezidente KI, Virgílio Guterres liuhosi konferénsia imprensa, Kintál Boot, Segunda (11/9).

KI hanesan órgaun  kompetente atu halo rejistrasaun ba órgaun  komunikasaun sosiál no meiu komunikasaun sosiál atu nune’e KI bele iha baze dadus hodi fó atensaun bainhira média sira hasoru problema ruma ligadu ba servisu jornalista sira nian.

KI husu ba órgaun  komunikasaun sosiál atu bele foti formuláriu iha KI atu bele hetan rejistu.

“Agora Konsellu Imprensa nakloke ona atu simu rejistu hosi média no meiu komunikasaun sosiál iha territóriu tomak,” Prezidente KI, Virgílio Guterres haktuir.

Durasaun rejistu média sira, Prezidente KI hateten, KI loke rejistrasaun nafatin tanba ba futuru média foun sei mai no laiha limitasaun rejistu media nian.

No mós KI sei la obriga órgaun  komunikasaun sosiál atu tenke mai rejistu maibé kuandu la rejista sei la iha sansaun só iha konsekuénsia katak bainhira iha reklamasaun ruma hosi públiku ba servisu média nia la tuir kódigu étika nian, KI sei iha difikuldade atu foti medida.

Maibé média sira kuandu rejistu signifika KI prontu atu hakaruk ba desizaun no orientasaun ne’ebé relasiona ho prátika di’ak.

KI prepara ona formuláriu ho nia kritériu hirak ne’ebé tuir lei hateten, buat ne’ebé aneksa ba formuláriu mak Estatutu Organizasaun iha lei hateten hanesan Estatutu Editoriál, esplika média ne’e ba asuntu públiku nian ga? Asuntu kona-ba kategoria feto nian de’it ga? No seluk tan tenke espresa iha ne’ebá.

Tenke aneksa mós mapamentu kona-ba servisu fatin iha ne’ebé?, Estrutura Organizasaun no Organograma hanesan órgaun  komunikasaun sosiál no meiu komunikasaun sosiál.

Enkuantu, média sira servisu hanesan kompañia entaun sira tenke rejistu komersiál  hanesan rejistu iha Ministériu Komérsiu no Indústria.

Rejistrasaun iha KI mós presiza kopia hosi rejistu komersiál hanesan dokumentu komprovativu ida inklui lisensa komersiál.

Órgaun  komunikasaun sosiál tenke aneksa hotu jornalista hira mak servisu iha instituisaun média no funsionáriu sira seluk ne’ebé servisu iha média mezmu la’ós jornalista.

Jornalista feto no mane hira?, Jornalista estajiáriu hira?, jornalista tama ona iha kontratu professional ga la’e? Inklui jornalista sira ho nivel edukasaun.

Entretantu, Estatutu Konsellu Imprensa nian iha artigu 52.0 kona-ba rejistu órgaun  no meiu komunikasaun sosiál katak elementu sira ne’ebé atu inklui iha rejistu ne’ebé prevee ona iha artigu 28.0 no alínea e) artigu 44.0 hosi lei komunikasaun sosiál ninian prosedimentu.

Jornalista: Zezito Silva | Editór: Manuel Pinto

Foto: Prezidente Konsellu Imprensa hatudu notisia falsa durante konferensia imprensa, ohin. Foto midia KI