Prezisa Inplementa Rejime Kontrola Tabaku

DILI - Organizasaun Aliansa Nasional Kontrola Tabaku husu ba governu foun mai  implementa rejime kontrola tabaku liuliu, deside presu minimu ba sigaru iha merkaduria.

Tuir Koordenador Organizasaun Aliansa Nasional Kontrola Tabaku, Matias do Santos  katak, governu kria ona kondisaun sira hanesan lei kontrola tabaku, rekursu humanu atu kontrola maibe, latau iha asaun. Nee duni, too agora iha Timor-Leste (TL)  susar atu hasai ema husi risku moras tanba fuma inklui prevene labarik sira husi moras kronika neebe kauza husi fuma sigaru.

Maske nunee katak, Matias nuudar sosiedade sivil pronto kolabora ho governu liuliu Ministerio Saude hodi halo sosializasaun ba rejime kontrola tabaku atu nunee komunidade liuliu estudante sira bele iha konsensia katak fuma nee ladiak ba saude.

“Ami kontinua advoka ho governu ba prosesu implementasaun, tanba lei nee aprova ona maibe ema barak seidauk hatene lei nee,” katak Matias ba Jornalista sira iha nia knar fatin, Kinta (7/9/2017).

Nia hatutan hanesan jerasaun foun sente preokupa ho grafiku presentajen konsumu sigaru neebe aas iha Timor-Leste. Tanba tuir dadus Organizasaun Saude Mundial mane adulto husi idade 18-69, 70 pursentu mak fuma, labarik sira husi idade 13-15, 42 pursentu fuma.

Tanba nee, bainhira lahalo intervensaun agora problema saude publika sei sai problema boot ba Timor–Leste.

Nasaun sira neebe produs tabaku grafiku konsumu tabaku tun. Maibe ba Timor maske lahalo produsaun ba sigaru no ita menus nutrisaun, maibe sira foti tempu fuma mak makas fali.

Tanba nee, governu mos tenke asegura ona kios kiik labele faan sigaru tanba, realidade hatudu kios kiik sira mak fo oportunidade ba labarik sira atu fuma liu husi sigaru neebe sira faan rahun ho folin neebe kiik.

“Hau sujere atu governu hasae folin sigaru ba minimu $ 5.00 kada masu. Atu nunee labele fo tempu ba labarik sira fuma, ema neebe fuma sira neebe iha osan,”dehan Matias.

Entertantu, Diretur Organizasaun Youth Unity For Community Progress, Antonio da Costa Martins hateten, kona-ba prevene fuma sira halo ona sosializasaun ba joventude sira iha munisipiu hanesan Munisipiu Manufahi, Lequisa no Dili kona-ba impaktu sigaru ba saude no ekonomia familia, maibe informasaun sira nee seidauk too ba ema hotu.

“Hau hanoin laos sira laiha informasaun liu, sira hatene hela kauza sigaru ba saude, maibe problema sentimentu tanba sira sente gostu,” katak Antonio.

Nia sujere governu tuir lolos tau ona prioridade ba implementasaun lei kona-ba fuma halo sosializasaun ba komunidade sira, atu nunee komprende hodi kontribui hanesan labele fuma iha fatin publiku.

“Ema hotu iha direitu atu fuma maibe ema hotu mos iha direitu atu moris iha ambiente neebe saudavel. Tanba nee governu tenki iha ona politika forte hodi implementa lei liuliu fo sansaun bae ma neebe viola lei,” dehan Antonio.

Antes nee Diretor Saude Publika Ministerio Saude Pedro Canisio dehan, Menisteriu  Comersio Industria ho Ministeriu Finansas  dezenvolve ona dekretu lei kona-ba presu sigaru, maibe  governu ida nee labele hasai politika inplementa lei nee tanba, nia mandate hotu ona. Nee duni, hein fali ba governu foun mai.

Tuir nia katak, presu neebe deside hasae folin sigaru husi U$ 19.00 kada kilo hasae ba U$ 300 kada kilo. Ba fali merkadu hasae ba U$ 10 kada masu ida, maibe seidauk hetan aprovasaun.

“Ami halo hotu tiha ona maibe governu ida nee labele hasai politika nee, entau ita hein ba governu foun mak ita bele haree fali lei ida nee lori ba Konseilho Ministru hodi aprova,” afirma Pedro.

Tuir Pedro katak, sigaru fo impaktu ba saude publika liuliu kria moras kardiovascular hanesan moras fuan, kankru, hipertensaun no seluk tan. Tanba sigaru kontamina ho 40.000 nicotina no beneno sira seluk neebe bele hamosu moras hira nee. 

Jeniche da Costa | Suara Timor Lorosae