Riku Matak KAK Tenke Book Aan

DILI - Komisaun Anti Korupsaun (KAK) tenke halao nia knar ho diak, matan moris no book aan hodi bele hareee ema neebe riku matak deit.

Deklarasaun nee, fo sai husi Advogadu Privadu Manuel Tilman ba Jornalista sira iha nia knar fatin Pantai Kelapa, Tersa, (12/09/2017).

Riku matak anti korupsaun tenke book aan. Agora anti korupsaun atu book aan, tenke iha lei ida tulun komisaun anti korupsaun, selae komisaun anti korupsaun lao la diak, no komisaun anti korupsaun laos ministeriu publiku, no komisaun investiga deit submete ba iha ministeriu publiku no ministeriu publiku mak akuza, no komisaun servisu didiak bazei ba lei, ministeriu publiku tenke simu, selae ministeriu publiku majistradu ida neebe la simu nee mos ba para kadeia,” hateten Manuel.

Sublinha tan, Lei neebe iha atu haforsa servisu komisaun anti korupsaun nia, neebe agora dadaun seidauk aprova husi parlamentu nasional iha prinsipiu rua.  Hanesan obras ida halo tiha akordu ho governu, maka la lao fali no ema nee sai riku tiha, osan ba obras nia mak emprejariu lori tiha fali nee krime nee korupsaun.

Nunee ministru ida neebe fo osan ba emprejariu, atu halo obra  hanesan halo ponte no ikus be tun mai lori tiha ponte, nee tenke tama kadeia la presija prova tan, ida nee mak tau iha lei anti korupsaun neebe too agora parlamentu seidauk aprova atu bele tulun komisaun sira.

Tilman afirma tan, se ema ida manan salariu atus tolu, derepenti nia bele iha uma andar rua tolu, iha kareta tolu, tanba nia diretor, nee presija haree lai bolu sinal de riqueza seim kauza, sira nee mak tama hotu iha lei anti korupsaun neebe too agora dadaun seidauk aprova nee.

Pontu importante rua husi lei anti korupsaun neebe agora dadaun seidauk aprova, mak hanesan prinsipiu neebe sai riku matak deit la iha kauza nee krime ona. No iha mos prinspiu ida seluk neebe halo tiha akordu ida menaan tiha, no ikus obra la lao emprejariu nee mos bele tama kadeia. Maibe hein katak parlamentu nasiona neebe foun, iha konsiente atu bele aprova lei ida nee.

Iha fatin hanesan finalista FCS UNTL, Mateus Soares hateten, parlamentu sira tenke aprova lei anti korupsaun, nunee bele tulun komisaun sira halo servisu ho diak.

Lei anti korupsaun nee importante atu sira bele haforsa no tulun komisaun anti korupsaun atu bele halao servisu ho diak, no forte liu tan. No hein katak parlamentu foun sira sei aprova lei ida nee, hodi tulun komisaun sira,” esplika Mateus.

Nia afirma tan, maske lei KAK nee seidauk aprova, maibe sira haree katak komisaun halao servisu ho diak tebes, koopera ho estadu kontinua halo nafatin investigasaun ba problema balu neebe iha. Tanba sira mos hakarak nasaun Timor, labele moris iha korupsaun nia laran. 

Terezinha De Deus | Suara Timor Lorosae