Masakre 12 Novembru Loke Mundu Internasional Nia Matan

DILI - Loron komemorasaun 12 Novembru importante, tanba liu husi loron nee maka loke mundu internasional nia matan konaba kestaun Timor Leste nian.

Xefi bankada Fretilin deputadu Francisco Branco hateten, Lakelur tan Timor Leste komemora masakre 12 Novembru, depois de luta diza seis anus rezistensia komesa mosu iha sidade sira Timor leste tomak.

“Loke Timor Leste ba pazjina mundu ida nee istoria ida nee presiza laos selebra festeza deit, maibe tenke halo reflesaun iha momentu istoriku ida neebe Timor Leste atu halo tranjisaun lideransa jerasun tuan ba jerasun foun iha ita,” dehan deputadu Branco, ba STL, iha Sala bankada Fretilin, Sesta (10/11/2017).

Deputadu Branco hateten, Halo reflesaun karik ba 12 Novembru maioria sira neebe mate iha masakre santa kruz nee mesak joven deit, nee hatudu katak komesa intrega luta rezistensia neebe laos deit iha Frenti Armada.

Iha fatin hanesan Xefi bankada PLP Fidelis Magalhaes hateten, Loron 12 Novembru ba Timor oan hotu, liu liu ba foinsae sira atu bele hetan inspirasaun husi loron 12 Novembru neebe joventude lubuk ida sakrefika sira nia vida, hodi nunee Timor leste bele hetan ukun rasik aan. 

Carme Ximenes/Maria Lay | Suara Timor Lorosae