Komponente Naval Importante atu Asegura Rikusoin Tasi

DILI, (TATOLI) – Prezidente Repúblika, Francisco Guterres Lú Olo, hateten Komponente Naval hosi FALINTIL-Forsa Defeza Timor-Leste (F-FDTL) importante tebes tanba proteje rikusoin iha tasi.

“Komponente Naval FALINTIL-FDTL nian importante tebe-tebes atu proteje ita-nia rikusoin sira no ajuda autoridade sivíl sira atu fiskaliza hodi garante ema la uza arbiru de’it ita-nia rikusoin sira no la viola lei Timor-Leste nian”, hatete Xefe Estadu iha ninia diskursu bainhira partisipa komemorasaun tinan ba dala 16 Komponente Naval iha Baze Navál, Hera, ohin.

Lú Olo haktuir tasi Timor iha ikan barak no ida ne’e bele hariku Timor ba beibeik bainhira iha kontrolamentu ba rikusoin sira ne’e ho di’ak.

“Ita-nia plataforma kontinentál, katak ita-nia territóriu, iha tasi-okos, la’ós iha de’it minarai maibé iha mós minerál sira seluk ne’ebé hariku ita. Ita-nia área-tasi sai kedas fonte estratéjika ida ba ita-nia rikusoin hafoin ita restaura independénsia”, subliña.

Nia haktuir tan tasi Timor mós iha buat seluk importante ne’ebé ho valór ás tebe-tebes iha nível internasionál—espesialista barak hakerek katak ahu-ruin no meti-ulun furak liu no sei naturál liu iha rejiaun.

“Enkuantu ita proteje kualidade ambiente no uza rekursu tasi no rai nian ho kuidadu, ita bele uza ba beibeik no ita bele haburas ekonomia nasionál ba tempu naruk no hasa’e empregu no ita-nia moris-di’ak –iha setór turizmu, peska no setór sira seluk”, haklaken.

Lú Olo esklarese Komponente Naval kontribui mós atu hakle’an kooperasaun rejionál ho país viziñu sira, iha nível bilaterál no multilaterál no haforsa estabilidade no seguransa rejionál. Tan ne’e, tuir nia, bainhira  habelar kbiit ba FALINTIL_FDTL ninia Komponente Navál, Timor-Leste bele kontribui liu-tan ba estabilidade iha rejiaun.

“Ita presiza estabilidade rejionál atu habelar ekonomia no relasaun entre Timor-Leste, rejiaun sira hosi Norte Austrália no provínsia indonézia sira ne’ebé besik liu ita-nia rain”, tenik eis líder rezisténsia.

Nia salienta FALINTIL-FDTL ninia Komponente Naval la’ós de’it fatór ida atu proteje soberania nasionál maibé fatór importante ida mós ba habelar protesaun ambientál no atu kaer metin ekonomia sustentável tasi nian no seguransa rejionál.

Lori Estadu Timor-Leste nia naran, Prezidente Repúblika hakarak rekuñese apoiu hosi parseiru dezenvolvimentu ba Komponente Naval hanesan Portugal, Austrália, Indonézia, Papua Nova Guiné no Estadus Unidus Amérika tanba apoiu hosi parseiru sira ne’e ajuda habelar objetivu sira, haforsa Komponenete Naval no haburas F-FDTL ninia kapasidade sira seluk.

Jornalista: Xisto Freitas | Editora: Rita Almeida

Imajen: Prezidente Repúblika, Francisco Guterres Lú Olo, bainhira partisipa selebrasaun tinan komponente Naval ba dala 16 iha komponente Naval Hera, ohin. Foto António Goncalves