Líder hosi Aliansa Mudansa ba
Progresu (AMP, opozisaun), hosi Timor-Leste, Xanana Gusmão, partisipa iha
loron-tersa oinmai iha enkontru importante ida iha ONU, Nova Iorke, hatete hosi
fonte ofisial sira.
Porta-vós hosi sekretáriu-jeral
ONU nian konfirma ona ba Lusa katak António Guterres iha markasaun ba enkontru
ida ho eis-Prezidente timoroan, iha loron-tersa oinmai, 24 Abril.
Viajen ne'e implika atu Xanana
Gusmão, ne'ebé iha loron hirak ne'e ativu hela iha AMP nia kampaña ba
lejislativu antesipadu 12 Maiu nian, sei la marka prezensa iha Timor-Leste
durante loron barak nia laran.
Líder na'in rua tuir loloos
hasoru malu iha loron 06 Marsu liubá, iha momentu ne'ebé maka Timor-Leste ho
Austrália asina tratadu foun ba fronteira tasi nian, ne'ebé negosia hosi Xanana
Gusmão, maibé líder timoroan kansela tiha nia prezensa.
Agora, Xanana Gusmão sei ba Nova
Iorke hodi partisipa iha reuniaun importante ida kona-ba "kontrusaun ho
sustentasaun dame nian" ne'ebé sei halo iha loron-tersa ho loron-kuarta
tuirmai.
Debate loron rua, ne'ebé sei iha
mós eventu oioin, promove hosi prezidente hosi Sesaun Asembleia-Jeral ONU nian
ba dala 72, Miroslav Lajcak, ne'ebé identifika ona kestaun kona-ba konstrusaun
ho sustentasaun dame nian hanesan prioridade.
Ajenda ofisial ONU nian indika
katak objetivu hosi enkontru ne'e maka "avalia esforsu ho oportunidade
sira ne'ebé halo hodi hametin serbisu iha ONU iha kontrusaun ho sustentasaun
dame nian" iha planeta. Enkontru hahú ho intervensaun hosi Lajcak ho
António Guterres.
Sekretáriu-jeral partisipa iha
loron-tersa iha "almosu importante" ida ne'ebé sei iha intervensaun
sira hosi Xanana Gusmão ho Mary Robinson, eis-Prezidente irlandeza.
Ajende enkontru nian hanoin mós
ba enkontru ida kona-ba "rekonsiliasaun ho lideransa hodi prevene konflitu
no iha sustentasaun dame nian" ne'ebé promove hamutuk hosi misaun
permanente sira Timor-Leste nian ho Indonézia nian iha ONU.
Partidu ho koligasaun polítika
ualu hahú ona iha loron 10 Abril kampaña ba eleisaun lejislativu antesipadu,
marka ba loron 12 Maiu. Kampaña hotu loron rua antes, iha 09 Maiu.
SAPO TL ho Lusa
Sem comentários:
Enviar um comentário