Oekusi Sai Fatin Dahuluk ba Grupu Peregrinasaun Turizmu Relijiozu

DILI, (TATOLI) — Ministru Turizmu, Manuel Vong, dehan Oekusi nu’udar fatin ne’ebé ligadu ho turizmu relijiozu nian,  tanba ida ne’e, Ministériu Turizmu (MT) lansa ona peregrinasaun turizmu relijiozu ba dahuluk nian, hahu hosi Oekusi.

“Fatin santu wa’in barak tebes, ida maka Jesus Morto iha ne’ebá, Santu António ne’ebé mak milagrozu tebes no fatin seluk ne’ebé uluk na’i-lulik misionáriu sira hahú sira-nia misaun. Tanba ne’e mak ita hili Oekusi. Ida seluk ita bele promove mós ita-nia kultura, fiar katólika ne’ebé mak iha tiha ona inkulturasaun ne’ebé kle’an tebes”, Vong hatete horisehik, iha lansamentu primeiru grupu peregrinasaun turizmu relijiozu Dili-Oekusi 20-30 iha Sentru Informasaun Turístika Lesidere.

Prioridade ida mak promove kultura timoroan nian no turizmu istóriku ne’ebé nakonu iha país ne’e. Tinan 500 nia laran antes portugés sira to’o, Timór iha kedan ona istória no iha funu mundiál to’o mai invazaun durante tinan 24 nia laran.

Aleinde halo peregrinasaun iha rai-laran, daudaun ne’e iha uluk ona jornada husi provinsiál Indonézia mai Timor-Leste ho padre hamutuk 20 resin.

“Tan ne’e ita hein kontinuasaun ida ne’e sei la remata. Primeira peregrinasaun ida ne’e la’ós dehan tinan ida dala ida. Husi ida ne’e fulan-fulan ita bele halo até loron-loron”.

Bispu Dioseze Dili, Don Virgílio do Carmo da Silva, katak Timor-Leste maioria katólika no iha poténsia barak tebes ne’ebé presiza atu promove.

“Ida promove ne’e la’ós kompete ba uma-kreda nian maibé hanoin iha ba ministériu ne’ebé haka’as aan tebes atu promove, maibé ba uma-kreda haree ba ida ne’e oportunidade furak ida atu ita bele promove ita-nia fatin fiar nian”.

Tanba ne’e bispu agradese tebes ho peregrinasaun ida ne’e atu fanu liután parókia hotu iha Timór laran tomak ne’ebé iha poténsia ba turizmu relijiozu katóliku ne’e atu pároku hamutuk ho komunidade mak hahú atu kria uluk kondisaun.

“Oinsá mak hamoos fatin ne’e atu ema gosta bá. Fatin ida ne’e la’ós moos de’it maibé iha dame, pás, serenidade, ema bá ne’ebá ne’e lata’uk, la hafuhu malu, ema bá hakmatek atu reza, bele deskobre buat seluk tan no liuhusi turizmu relijiozu ne’e la’ós de’it atu promove buat ne’ebé dehan aspetu sosiál, ekonomia no kultura nian maibé uma-kreda nia haree katak atu promove mós ita-nia espirituálidade”.

Diretór Jerál Administrasaun no Finansas MT, Augusto Oliveira de Carvalho, hatete ministériu nia papél importante atu halo promosaun ba área turizmu nian tanba ne’e husu parseiru sira hotu atu hamutuk hodi dezenvolve turizmu nó mós Timor-Leste ida ne’ebé kapa ‘as no furak liu ba aban-bainrua bainhira preparadu atu simu vizita husi turista sira.

“Tanba ne’e mak halo lansamentu ba primeira peregrinasaun grupu ida ne’ebé bá Oekusi durante loron tolu. Grupu ida ne’e ba dahuluk hahú servisu ho Ministériu Turizmu no ministériu prontu atu kontinua programa ida ne’e iha tinan oin mai nó mós ba tinan sira seluk tuir programa ministériu nian”.

Jornalista : Maria Auxiliadora | Editór : Manuel Pinto

Imajen: Lecidere Dili. 19 de Abril 2018 |Ministro Turismo Dr. Manuel Vong no Bispo Diocese Dili, Amo Virgilio do Carmo da Silva, SDB, halo lansamentu ba programa Turismo Religiozu Primeiro Grupo Peregrinasaun Dili – Oé-cusse, programa ida ne’e realiza tamba servisu hamutuk entre VII Governu Konstitusional, liu-liu Ministério Turismo no Parte Igreza Katolika. FOTO MT