Guiné Ekuatorial hakarak akolle reuniaun másima iha tinan 2022

Guiné Ekuatorial hakarak akolle simeira Komunidade Nasaun sira Lian Portugeza nian (CPLP) iha tinan 2022, hafoin prezidensia angolana iha organizasaun, hatete asesor Prezidente ekuato-guineense nian, loron-sesta ne'e ba Lusa.

Iha deklarasaun ida ba Lusa, Murade Murargy, asesor Teodoro Obiang Nguema nian ba asuntu sira konaba komunidade luzófona, afirma katak Malabu hakarak simu konferensia xefe Estadu no Governu CPLP nian iha tinan 2022, nune'e asume prezidensia ba organizasaun ba periodu rua oin mai.

Autoridade Guiné Ekuatorial sira afirma tiha ona disponibilidade ba organizasaun atu organiza simeira 2020, maibe la konsegue formaliza kandidatura, iha konferensia CPLP ba dala 12 ne'e, ne'ebé halao iha loron-tersa no loron-kuarta ne'e iha Santa Maria, illa Sal, Cabo Verde.

Angola sai hanesan nasaun ne'ebé maka hili, "hosi unanimidade no aklamasaun", ba prezidensia hafoin Cabo Verde, entre tinan 2020-2022, hafoin sujestaun hosi prezidente ezersísiu CPLP nian, xefe Estadu cabo-verdianu, Jorge Carlos Fonseca.

Antigo sekretário-ezekutivu komunidade luzófona (2012-2016), ne'ebé akompña Teodoro Obiang ba reuniaun iha illa cabo-verdiana Sal ne'e, hatete ba Lusa katak Prezidente da Guiné Ekuatorial konsidera "nia partisipasaun ne'e positiva tebes iha simeira ne'e, tanba kontribui ba sentimentu konfiansa entre lideres organizasaun ne'e nian".

Lusa kontakta, fonte diplomasia portugueza hatete de'it katak fatin ba simeira 2022 sei hili iha konferensia ba dala 13, iha Luanda. Desizaun ba CPLP sempre halo ho konsensu.

Embaixador CPLP Guiné Ekuatorial nian iha Lisboa, Tito Mba Ada, konfirma intensaun autoridade Malabu sira nian ne'e.

"Guiné Ekuatorial sempre disponivel no sei disponivel nafatin atu organiza simeira CPLP ne'e", afirma diplomata ne'e ba Lusa.

Tito Mba Ada subliña katak nia nasaun ne'e akolle tiha ona simeira ida Uniaun Afrikana nian, ne'ebé reúne Estadu 50 liu, no garante katak iha kapasidade atu realiza reuniaun organizasaun luzófona ne'e, ho membro 9.

Guiné Ekuatorial, antigu kolonia española, tama ba CPLP iha tinan 2014 tuir roteiru akordu nian, ne'ebé inklui kompromisu hodi promove no fahe lian portugueza no bandu ba kastigu ba mate.

Teodoro Obiang mós hatete iha simeira iha Cabo Verde ne'e, katak nia nasaun tuir "neneik no seguru" roteiru hodi tama ba komunidade, maibe so hatete konaba dezenvolvimentu hodi promove portuguêz no nia la refere konaba kastigu ba mate.

Autoridade Malabu sira hein atu tau kastigu masimu ida iha tinan 2014, bainhira iha akordu ne'e, no garante katak dezde ne'e sei laiha tan oho, maibe justisa Guiné Ekuatorial nian kontinua iha kastigu ba oho iha kuadru legal nian.

Iha deklarasaun ba imprensa, prezidente CPLP, Jorge Carlos Fonseca, asume hanesan "defensor ba hodi halakon kastigu ba mate ne'e" no hatete katak hakarak ne'e atu akontese iha Guine Ekuatorial durante mandatu cabo-verdianu nian ne'e, ka, tinan rua ne'e.

Xefe Estadu cabo-verdianu ne'e hatete,iha final ba simeira Sal ne'e katak, nia maka sujere Angola hodi asume prezidensia ba komunidade tuir mai, iha tinan 2020, ne'ebé hetan mós apoiu hosi lidere sira seluk, inklui mós Teodoro Obiang.

Durante konferénsia xefe Estadu no Governu CPLP ba dala 12, ne'ebé halao entre loron-tersa ne'e no loron-kinta ne'e, Cabo Verde sei asumi prezidénsia ba organizasaun ne'e, durante periodu tinan rua, ho tema "Kultura, Ema no Oseanu sira".

Angola, Brazil, Cabo Verde, Guiné-Bisau, Guiné Ekuatorial, Mosambike, Portugal, São Tomé & Prínsipe no Timor-Leste maka halo parte hanesan Estadu-membru CPLP nian.

SAPO TL ho Lusa