Demonstrasaun MUTL Tau Kaisaun 1, Olinda: MUTL Bele Tau Kaisaun 65

DILI - Relasiona ho Movimentu Estudante Universitariu Timor-LESTE (MUTL) halao asaun demonstrasaun ba hapara sosa kareta foun no husu eis deputadu III lejis;atura entrega prado, asaun nee halo mos kaisaun ida, tanba nee Deputada Khunto Olinda husu atu  halo kaisaun 65, laos deit ba Prezidente PN ho Vice, tanba desizaun nee koletivu.

Liu husi Sesaun Plenaria Segunda (29/10/2018) iha uma fukun Parlamentu Nasional, iha intervensaun Deputada Bankada Khunto Olinda Guteres hatete, estudante sira halo demonstrasaun nee iha nain 2 hatais fali farda partidu balu nian, ida nee dalaruma sira balu ladun hatene kona ba buat sira nee.

Iha asaun nee estudante sira tau kaisaun 1 no taka foto Prezidente Parlamentu no mos Primeira vice Prezidente nian, maibe atu dehan katak nee laos desizaun meza nian deit, maibe nee desizaun koletivu entre deputadu 65.

Se estudante sira nafatin organiza demonstrasaun ida nee, Hau hakarak sira bele halo, maibe se bele halo kaisaun 65 ho lilin, hodi sunu mai ami. Karik buat sira nee loos duni estudante halo nee entaun ita kalo sei mate iha finadu nia laran, maibe se laos hanesan saida mak estudante sira nia hanoin, entaun rai nain sei selok fali sira,” katak Olinda iha sesaun plenaria.

Nia dehan, iha demonstrasaun nee estudante sira hatete katak, sira pronto fakar raan, no prontu mate, ida nee nia husus atu lalikan tauk, tanba tempu raan fakar nee liu ona.

Nia parte haree iha demonstrasaun nee hanesan suruhan, tanba nee nia husu ba estudante sira iha demonstrasaun nee, atu koidadu, bainhira akontese buat ruma lalikan fo sala ba sira deputadu nain 65.

Nunee mos Xefe Bankada PD Antonio da Conceicao, demonstasaun neebe halao husi estudante sira respeita nafatin liberdade expresaun, maibe aktus ida neebe estudante sira halo hodi mos kaisaun, ida nee laos foin akontese, maibe desde 2017 sira halo demonstrasaun halo kaisaun hodi taka eis Prezidente PN nia foto no mos deputadu sira balu nia foto, ida nee nia parte ladehan insulta maibe nee dezrespeitu ba ema selu nia moris.

Hatan ba kestaun nee Prezidente PN Arao Noe hatete, “Atu mate nee so destinu mak bele mate, neebe ba hau lapreokupa ho lilin, kaisaun neebe mak iha, maibe destinu nee iha nain maromak nia liman, buat hotu entrega ba iha leten aas ba,”hatete PPN Arao. 

Notisia kompletu lee iha jornal STL edisaun Tersa (30102018)

Guilhermina Franco | Suara Timor Lorosae