Pagamentu 60% sei finaliza iha 15 Agostu

Prezidente Administrasaun Institutu Nasional Seguransa Sosial (INSS), Longuinhos Armando, informa, pagamentu porsentu 60 ba kompañia hirak ne’ebé eziste, relasiona ho COVID-19, sei finaliza iha loron 15 fulan ne’e.

Prezidente Administrasaun Instituto Nasional Seguransa Sosial (INSS), Longuinhos Armando informa, pagamentu ho porsentu neen nulu ba traballador sira ne’ebé serbisu iha kompañia sei remata iha loron 15.

Durante iha situasaun COVID-19, Governu liu husi institutu nasional seguransa sosial, fó subsidiu ba traballador sira ne’ebé hala’o knar iha empreza privadu sira ho montante pursentu nen nulu kada traballador.

Ho orsamentu porsentu 60% ne’ebé mak Governu selu ne’e, transfere direta ba konta bankaria traballadór sira ni’an, bazeia ba dekretu lei númeru 16.

“Ita nia pagamentu sei hala’o nafatin liu-liu ba 60% ba traballadór sira tuir tékniku sira ne’ebé relata mai ha’u katak, laiha tan difikuldade ruma dia 15 de agustu ita bele finaliza ona halo pagamentu ba ita nia traballador sira ba 60%, ne’e tékniku sira kuandu ha’u husu ona horseik sira relata katak, iha 15 de agustu ita bele finaliza pagamentu 60% ne’e ita kuaze tama ona besik 5 mill ona restu sei iha tan, tanba husi kuaze 35 mil traballadór ne’ebé ke rejistu iha seguransa sosial no sira foun la’os husu ita hotu hotu ajuda 60% balun husu de’it para estende de’it 6%, tanba ne’e mak agora dadaun ita halo pagamentu kuase tama 5 mil”, dehan, Prezidente INSS, Longuinhos Armando ba GMN, iha Caicoli, Kinta

Tuir Longuinhos Armando, maske pagamentu porsentu 60% finaliza atraza, maibé importante mak apoiu ne’e bele to’o iha traballadór sira nia liman.

To’o oras ne’e dadauk INSS seida’uk simu reklamasaun ruma husi kompañia ruma, maibé simu ona reklamasaun husi traballadór balun.

INSS mós simu reklamsaun husi kompañia ne’ebé mak foin husu atu rejistu, hodi bele hetan apoiu refere, maibé lei la fó dalan, tanba data ikus atu rejistu kompañia, taka ona iha loron 29 fulan juñu liu ba no data atu hato’o pedidu taka ona iha loron 15  jullu.

Tuir dadus ne’ebé mak iha, total kompañia ne’ebé mak dadaun ne’e rejistu ona iha institutu nasional seguransa sosial, besik rihun rua.

Ina | GMN TV - Grupo Média Nacional