Governu hahú diskute implementasaun projetu kabu submarinu fibra ótika

DILI, 10 agostu 2020 (TATOLI) -- Primeiru-Ministru, Taur Matan Ruak konvoka reuniaun ho membru Governu relevante kona-ba implementasaun projetu kabu submarinu fibra ótika.

Enkontru ne’e partisipa husi Vise Primeiru-Ministru no Ministru Planu no Ordenamentu, José Maria dos Reis, Ministru Prezidénsia Konsellu Ministru, Fidelis Manuel Leite Magalhães, Ministru Transporte no Komunikasaun, José Agustinho Da Silva, no Vise-Ministra Finansa, Sara Lobo Brites. Ba asuntu ne’e, Ministru José Agustinho, hateten enkontru ohin hanesan koordenasaun ho ministériu relevante sira hodi aselera projetu ne’ebé Governu konsidera estratéjiku ne’e.

“Ami hasoru malu Primeiru-Ministru hodi diskute oinsá aselera projetu estratejiku fibra óptika. ein prinsípiu diskute tipu modalidade saida maka Governu sei opta, kona-ba asuntu ne’e ekipa tékniku Ministériu Finansa iha esperiénsia no uza ba implementasaun projetu sira. Sira sei haree ne’ebé mak di’ak, vantajen no desvantajen modelu sira atu ita bele opta ba projetu infraestrutura ligadu ho fibra óptika,” relata Ministru Transporte no Komunikasaun, hafoin enkontru ho Xefe Governu, iha Palásiu Governu, segunda ne’e.

Governante ne’e dehan, daudaun ne’e tékniku sira sei halo preparasaun ba realizasaun projetu fibra óptika.

“Durante ne’e iha parte telekomunikasaun dependénsia ba rede satélite, entaun problema durante ne’e maka presu a’as tebes husi tempu ba tempu amenta. Tanba ne’e maka Governu iha vontade tomak atu aselera implementasaun fibra óptika hodi redúz situasaun durante ne’e ligadu ho internet ne’ebé mak ninia folin hatodan mákina Estadu,” nia akresenta.

Ministru José Agustinho, haktuir kada tinan Governu selu satélite hamutuk millaun $120 no orsamentu ne’e hatodan tebes Orsamentu Jerál Estadu (OJE).

Daudaun ne’e, banda internet internasioál ne’ebé maka Timor-Leste iha ho kapasidade 6 Gigabyte/second, ne’ebé fahe ba populasaun iha territóriu tomak ne’ebé asesu ba internet liuhosi operadór Timor-Telecom, Telkomcel no Telemor. 

Enkuantu, Governu liuhosi Ministériu Transporte no Komunikasaun (MTK) aluga bandwith ho kapasidade 200 megabyte/segundu hodi oferese ba instituisaun Estadu sira.

“Ita-nia problema durante ne’e mak internet ninia kapasidade neneik, kondisaun durante ne’e iha de’it 200 megabyte/second atu ita fahe ba instituisaun Estadu hamutuk 140,” nia hatutan. Tuir Ministru ne’e, Governu iha ona planu atu atualiza husi kapasidade 200 megabyte ba 1 Gigabyte, atu bele ajuda bainhira seidauk iha rede fibra ótika.

”Durante ne’e, Governu iha ona opsaun katak sei dada fibra ótika husi Indonézia, Austrália, ka Singapura, maibé Governu sei haree didi’ak atu deside no halo desizaun koletiva,” nia akresenta.

Maski nune’e, José Agustinho otimista katak iha tinan 2020 nia laran, tenke implementa projetu fibra ótika, nune’e bele redúz despeza.

Jornalista: Antónia Gusmão Editora: Julia Chatarina