Autór hana iha Aimutin tama Prizaun Preventiva

Timor Post (10/08/2020) -- Segundu Komandante Polísia Munisípiu Dili, Superintendente Polísia Euclides Belo, informa katak autór ba kazu Arma Branka ka kazu hana ema iha Ai mutin, tribunal hatún ona pena Prizaun Preventiva.

Euclides adianta autór ne’e polisia kaptura bazeia ba mandatu detensaun no kaptura iha loron 5 Fulan Agostu detein oras 72 iha sela polisia molok aprezenta ba tribunal.

“PNTL kumprimenta mandatu detensaun, buska, revista no detensaun ba suspeitu ida ne’ebé maka hana ema iha ai mutin, ita Kaptura iha dia 5 Agostu, detein períodu 72 oras, agora daudaun arguidu simu ona medida hosi Tribunal hodi hetan prizaun preventiva”, informa Euclides, ba jornalista iha kuartél PNTL Munisípiu Dili, segunda,(10/08).

Segundu Komandante PNTL Munisípiu Dili adianta prizaun preventiva la temi tinan hira, más suspeitu ne’e Tribunal husu para atu kumpre Prizaun Preventiva.

Superintendente Polisia ne’e apresia, katak ida ne’e maka PNTL Munisípiu Dili hamutuk ho entidade sira seluk ho servisu sekretu sira seluk nia esforsu, hodi hatán públiku ninia preokupasaun ba kapasidade Polísia nian.

Enkuantu kazu ne’e akontese iha loron Segunda (13/07) iha Ai-Mutin Comoro-Dili.

Jornalista: Julio Salinas

Lee mós iha Timor Post:

Novembru Ezame Nasionál

Dalan Ilegál Luan, Australia Sei Apoiu Konteiner Ba UPF