Migrante millaun ida resin to'o ona Eropa iha 2015

Migrante millaun ida resin to'o ona Eropa, liuhosi tasi, iha 2015, tuir hosi informasaun sira ne'ebé publika iha loron-kuarta ne'e hosi Komisariadu Aas ba Refujiadu sira (UNHCR).

Hamutuk, ema 1.000.573 to'o ona iha Eropa liuhosi tasi no na'in 3.735 mate, hodi tenta kumpri travesia ida ne'ebé perigozu, haktuir hosi ajénsia ONU ne'ebé nia sede situa iha Jenebra.

Migrante sira barak liu (84%) mai hosi nasaun sanulu, ho Síria maka iha pozisaun dahuluk - reprezenta nasionalidade besik metade (49%) - tuir Afeganistaun (ho migrante 21%) no Irake (8%).

Migrante sira seluk mai hosi Eritreia, Pakistaun, Nijéria, Somália, Sudaun, Gámbia no Mali.

Hamutuk, migrante 844.176 to'o iha Grésia, na'in 152.700 to'o iha Itália no na'in 105 to'o iha Malta.

Hosi migrante sira ne'ebé to'o iha tasi-ibun sira Eropa nian, mane hamutuk 58% no feto hamutuk 17%, labarik sira hamutuk 25%, haktuir hosi UNHCR.

SAPO TL ho Lusa