MLPM FO OPORTUNIDADE BA EMA HOTU

Partidu Movimento Libertasaun Povu Maubere (MLPM) hamrik hodi fo oporunidade ba ema hotu hanesan iha prosesu dezenvolvimentu nasional.

Prezidenti MLPM, Nelson E.S. Martins, afirma katak, liafuan Democratica ne’e maka hamutuk ho néon-ida, laran-ida hari tan Partido ida hanaran Partido Movimento Libertasaun ba Povu Maubere (MLPM).

“MLPM moris tanba ejijensia husi situasaun politika rai laran nebe la kondis ona ho ita nia mehi, povu maubere nia mehi, mehi atu hetan Timor Independensia nebe fo oportunidade hanesan ba ema hotu,” hateten Nelson Martins iha sede nasional MLPM Sabadu (19/12/2015).

Nelson Martins hatutan tan katak mehi juventude maubere atu hetan servisu digno iha sira nia rain rasik, mehi povu agrikultores atu hetan rendementu diak husi sira nia produto agrikola, no mehi buibere sira iha area rurais atu hetan asesu diak ba saude, saneamento, be’e mos, no edukasaun, sei kumpri hotu husi MLPM.

MLPM mosu, tuir Nelson Martins, atu kumpri no implementa liafuan multi partidarismu nebe konsagra ona iha konstitusaun – RDTL.

“Ita hasae ona Bandeira MLPM iha sede Nasional-laletek Matadouro-Villa-Verde. Ida ne’e foin maka pasu primeira (langkah awal) husi Jornada naruk (perjalanan panjang) ida atu alkansa ita nia mehi, povu ida, nasaun ida, visaun ida – ba liberta povu maubere,” hateten Nelson Martins.

Nia esplika liu tanpu ida katak Timor ne’e ida deit, la iha lorosae, loromonu, laiha metan-la iha mutin, la iha ema foho leten no ema dolok oan, laiha ema sidade ka ema knua.

“Atu hetan povu ida ita persisa servisu makas hodi hametin unidade nasional, promove dialogu kontinua, no hametin rekonsiliasaun nebe baseia ba lia los no justisa,” eis Ministru Saude ne’e mensiona hikas.

Nasaun ida katak nasaun RDTL maka nasaun ida nebe Timor oan hotu tenki taneas, hamorin nia naran, hametin ninia dignidade no defende ninia soberania husi foho, lalehan no tasi.

“Atu hetan Nasaun ida ita hotu persisa hametin liutan espiritu nasionalismo, patriotismo no solidarismo loron-loron iha uma, iha to’os, iha natar, iha eskola, iha mercado, iha dalan no iha ita ida-ida nia servico fatin,” tenik Nelson.

Vizaun ida katak visaun atu liberta povu maubere hanesan individu (ema) ida-ida husi dezemprego, moras, beik, exploitasaun, explorasaun no diskriminasaun.

“Atu alkansa visaun ida ne’e, ita hotu percisa estabelese estratéjia desenvolevmentu Nasional ida ne’ebe fo valorisaun boot liu ba ema (humanu) ninia dignidade no moris diak, estratejia desenvolvemento Nasional nebe bele kria oportunidade hanesan ba ema hotu iha area ekonomia,sosial no Justica ho liafuan seluk ema husi foho leten ka dolok kuak, knua ka cidade tengki hetan oportunidade hanesan iha desenvolvimento nasional,” informa Nelson.

Presidente partidu MLPM husu mos ba militantes sira atu implmenta estratejia dezemvolvimentu ekonomia povu maubere no fo dalan atu investe makas iha setor edukasaun no saude.

“Ita nia ideolojia sentru-eskerda, loke dalan mai ita atu implementa estratejia desenvolvimento ekonomia Povu Maubere (ekonomia Kerakyatan), fo dalan atu investe makas iha sector edukasaun no saude hodi hadia kualidade edukasaun no saude ba Povu Timor Leste tomak. fo dalan mai ita atu estabelese empresa publika iha área Agrikultura no tourismo hodi loke kampo de trabalho digno ba Juventude sira iha rai laran, liu-2 sira nebe hela iha áreas rurais, mai ita hotu hamulak hodi husu ba matebian, herói, no lulik sira hotu atu kontinua tulun no hamutuk ho ita iha jornada naruk ida ne’e,” Nelson hatutan.

Iha biban ne’e mos presidente MLPM deklara ba publik no povu Timor laran tomak katak ofisialmente hamrik hodi haburas demokrasia iha nasaun deben Timor Lorosae.

“Hau Nelson Martins Presidente Partido MLPM deklara ba publik no povu Timor tomak katak Partido Movimento Libertasaun Povu Maubere ofisialmente hamrik hodi haburas demokrasia iha Nasaun doben RDTL no preparadu atu kompete iha elesaun jeral 2017,” Nelson afirma hikas. nes

Jornal Nacional