ISTÓRIA CRUZ JOVEN NO ILHAS NA’IN FETO PEREGRINA

Cruz Joven no Ilhas Na’in Feto Peregrina ne’ebé mak oras ne’e dadaun dala ida la’o haleu rai Timor, hodi fó matak malirin ba sarani sira iha territóriu tomak ne’e ninia istória mak hanesan, Inisiadór no Fundadór ba Cruz Joven ne’e mak Amu Rolando Fernandes, SDB.

Cruz Joven ne’e harii iha dia 18 de Abril 1993, iha fatin Eskola Sekundáriu Santo António (ESSA) Teulale-Baucau, ou iha tempu Indonesia, Sekolah Mengah Atas Katolik (SMAK) Teulale Baucau.

No altura ne’ebá Padre Rolando Fernandes, SDB mós sei hanesan Diretór Eskola SMAK, Baucau.

Cruz Santo ne’e hetan Bensaun husi Amo Bispo Dom Cárlos Filipe Ximenes Belo, SDB ne’ebé iha momentu ne’ebá sei hanesan Administradór Apostólico Diocese Dili Timor Leste (TL), tanba iha momentu ne’e mós Baucau sei hanesan Paroquia ne’ebé seidauk sai Diocese ketak.

Hafoin misa no hetan bensaun husi Amo Bispo Dom Cárlos, Jovens hamutuk ho sarani sira Paroquia Baucau entrega kedas Cruz Santo ne’e ba Paroquia Maliana.

Inisiativa Amo Rolando kria Cruz Joven ne’e ho intensaun ida atu halibur foinsa’e sira Timoroan hotu, hodi halo reflesaun no selebra Paskoa hamutuk ne’ebé iha momentu ne’ebá hanaran Paskoa Foinsa’e ne’ebé selebra tinan-tinan iha kada Paroquia.

“Obrigada Amu…ba inisiadór harii cruz jovem..Na’i haraik bensaun no graca wa’in ba ita no ba missionáriu hotu ne’ebé servi ba kreda iha rai Timor-Leste”, alumni estudante SMAK espresa nia sentiment ida ne’e iha rede komunikasaun social, wainhira akompaiña vizita Cruz Joven no Ilhas Na’in Feto iha Diocese Dili.

Alénde ne’e, nia mós harohan ba Cruz Jovem atu haraik mós bencaun no graça wa’in ba Amo Bispo Dom Cárlos, ne’ebé oras ne’e dook husi sarani Timor Leste nia matan.

“Cruz Jovem ami nia huun no salvasaun haraik dame mai ami hotu. Hodi hala’o ami nia fiar sarani…amen”, Mize foti matan leten hodi harohan.

Nune’e mós istória konaba Ilhas Na’in Feto Peregrina ne’ebé mak oras ne’e dadaun hamutuk ho Cruz Santa hodi la’o hadulas rai Timor ne’e, mai husi Paroquia Hatolia hahú iha tinan 1987-1988, hodi la’os haleu Timor laran tomak.

Iha momentu ne’ebá sarani sira rihun ba rihun halo prosisaun reza no hananu, bidu ho tebes hodi simu no entrega Ilhas Na’in Feto nian husi Paroquia ida ba Paroquia seluk.

Maibé hafoin tinan barak nia laran, Ilhas Na’in Feto Peregrina nian hela iha nia fatin iha Paroquia Hatolia, iha tinan 2014 liu, Amo Bispu sira Diocese tolu desidi hodi hal peregrinasaun hamutuk Cruz Jovem ho Ilhas Na’in Feto Peregrina la’o haleu Timor hodi selebra festa tinan 500 Katolika tama iha Timor.ixo

Jornal Nacional