Dezenvolvimentu Ekonomia Atu Lao Diak, Feto Tenke Halo Mudansa iha 2016

DILI - Partisipasaun feto ba Dezenvolvementu Nasional seidauk masimu, maske iha oituan hetan ona apoiu gusi governu hodi halo sira nia atvidade kooperativas iha rai laran, maibe sira nee deit seidauk sufsiente atu dezenvolve ekonomia iha rai laran, tan nee tenke halo mudansa iha tinan 2016 nia laran.

Tuir Reprenrezante povu iha uma fukun Parlamentu Nasional (PN) Prezidente Comisaun D neebe trata asuntu Ekonomia Jacinta Pereira katak, partisipasaun feto ba dezenvolvementu Nasional nee minimu tebes, maske governu liu husi Sekretaria Estadu Mulher halo esforsu hodi fo formasaun ba feto maluk sira, maibe konsensia Timor oan barak seidauk adapta atu halo atividade sira hanesan nee.

Hau hanoin governu fasilita ona kondisaun, maibe ita maka tenke aproveita atu halo buat ruma iha ita nia rai laran, hodi dezenvolve ita nia rai ida nee ho diak, se laos Timor oan se tan, tamba labele fo oportonidade ba ema husi rai liur maka Timor oan rasik tenke halo mudansa ba ita ida-idak nia aan,” dehan Jacinta ba STL, Segunda (04/01/2016) iha nia knar fatin PN.

Nia informa liu tan katak, maluk barak maka hetan ona oportonidade, maibe too ikus mai hapara tiha sira nia atividade negosio, tamba sira hare deit ba apoiu husi governu, maibe lolos nee kuandu hetan ona oportonidade maka tenke iha inisiativa rasik, atu nunee bele dezenvolvementu ekonomia nee lao ho susesu iha rai laran.

Iha fatin hanesan Deputadu Antonio Ximenes hatutan, partisipasaun feto iha dezenvolvimentu Nasional seidauk maioria, maibe tenke sura ona ho sira neebe maka hahu lao dadauk ona, tamba nee husu ba sira neebe lao ona ba oin tenke mantein, maibe sira neebe maka seidauk lao nee hahu iha hanoin atu halo saida iha tinan foun ida nee.

Nunee mos Deputada Josefa Pereira hatutan, partisipasaun feto ba dezenvolvimentu Nasional nee importante tebes, no agora feto barak maka hola parte dadauk ona, maske seidauk masimu, maibe fiar katak feto sira sei halo mudansa ba sira aan hodi kontribui ba dezenvolvimentu iha rai ida nee. Informasaun kompletu iha STL Jornal no STL Web, edisaun Tersa (5/1/2016). Madalena Horta/Josefa dos Santos

Suara Timor Lorosae