LEI “KADEIRA” IMPORTANTE BA PN, INTERESE POVU KONTINUA KADUKA

Parlamentu Nasionál (PN) agora dada’uk preokupa kona-ba Lei resensiamentu eleitoral, lei Sukus no lei indultu nia para bele aprovasaun lalais, tanba konsidera lei hirak ne’e importante tebes, maibé lei kona-ba interese povu nian hanesan lei rai to’o agora kontinua kaduka no budu iha meza PN.

Prezidenti Komisaun A Parlamentu Nasionál, Carmelita Moniz hateten katak, lei ne’e iha segunda lejistlatura, PN aprova tiha ona, maibé Prezidenti Repúblika (PR) veto tiha lei ne’e.

“Ami tenke haree lei ida ne’ebé mak mais prioridade, lei sira ne’ebé baixa ba komisaun A ne’e, kuaze iha prioridade hotu, li-liu lei Suku ne’ebé mak ita tenke halo eleisaun ba tinan ida ne’e. Lei indultu ne’e mós prioridade hotu para Prezidenti labele fó nar-naran indultu ba ema, tenke haree tuir nia prosediamentu,” dehan Carmelita Moniz ba Jornalista sira iha PN, Segunda (01/02).

Nia hatutan, iha momentu ne’ebá PR haruka fali lei ne’e ba PN, maibé Parlamentu la konsege tanba tama ona iha prosesu eleitor’al.

Carmelita dehan, tama iha terseiru lejistlatura mós, Governu haruka ona lei ne’e ba PN, maibé meza PN la baixa lei rai ne’e ba komisaun A.

“Kuaze budu iha ne’e (Parlamentu Nasionál), tinan ida resin, Prezidenti bankada Parlamentares husu ba Prezidenti atu atu baixa ona lei ne’e ba komisaun A, tanba lei ne’e importante tebes ba ita nia dezenvolvimentu, li-liu ba povu, tanba povu iha problema barak kona-ba kestaun rai,” Carmelita informa.

Nia hatutan, agora Timor Leste (TL) iha situasaun tolu ne’ebé diferente tebes, tanba uluk povu uza rai tuir beiala sira nia régra no tradisaun TL nian, depois tama fali iha era Português nian, balun uza rai ne’e tuir fali era kolonialismu Português nian, hodi pasa tan mai okupasaun Indonesia to’o agora.

“Entaun ita iha situasaun hat ne’ebé ke agora dada’uk ita tenke rezolve situasaun rai ho uma sira ne’e,” Carmelita afirma.

Nia afirma, deputadu sira sempre hakilar ba meza Parlamentu hodi husu atu baixa ona lei ne’e ba komisaun A, maibé meza mak iha kompenténsia, lei ne’e to’o agora seida’uk baixa ba komisaun A.

Carmelita informa, agora dada’uk komisaun A iha lei nen, maibé la inklui ho lei rai nian.

“Lei ne’e kaduka tiha ona ba sestu Governu, entaun Governu mak tenke hatama fali proposta lei ne’e ba fali Parlamentu Nasionál, maibé to’o agora, Governu seida’uk hatama fali proposta lei rai ne’e mai iha Parlamentu Nasionál,” tenik Carmelita Moniz.cos

Jornal Nacional