Xanana Gusmão defende iha tribunál rekursu ba fundu hosi kontinjénsia ba kama ospitalár sira

Eis-primeiru-ministru timoroan Xanana Gusmão defende iha loron-tersa iha tribunál rekursu ba fundu kontinjénsia hosi Governu hodi sosa urjente, iha tinan 2011 no 2012, kama ospitalár sira hodi hatán ba nesesidade iha sistema saúde nian.

Xanana Gusmão sai hanesan sasin defeza nian iha julgamentu hosi eis-ministra timoroan na'in rua ne'ebé hetan akuzasaun ba partisipasaun ekonómiku iha negósiu no administrasaun prejudisiál.

Eis-ministra Finansa, Emília Pires, no eis-visi-ministra saúde, Madalena Hanjam, hetan akuzasaun ba iregularidade bainhira sosa kama ospitalár atus resin iha kontratu sira adisaun ba Emília Pires nia laen nia empreza, ho konspirasaun entre sira na'in tolu hodi konkretiza negósiu ho folin dolár rihun 800.

Xanana Gusmão, atuál ministru Planeamentu no Investimentu Estratéjiku, defende ona nia desizaun bainhira iha tempu ne'ebá kaer knaar nu'udar primeiru-ministru, hodi uza fundu kontinjénsia hodi hatán ba surtu dengue nian.

Nia esplika katak hospitál sira iha tempu ne'ebá laiha kondisaun hodi hasoru ho situasaun no sosa kama hanesan resposta ida hodi hatán ba surtu ne'ebé inklui fundu sira ba materiál no ekipamentu sira seluk.

Xanana Gusmão defende ona desizaun hodi sosa kama sira hodi konsidera katak saúde "la'ós de'it ai-moruk sira".

"Saúde la'ós de'it fó ai-moruk sira. Ita gasta dolár millaun resin iha ai-moruk sira ne'ebé depois estraga. Problema la'ós falta ai-moruk maibé oinsá ita uza ai-moruk sira, oinsá kondisaun sira", nia hatete.

Xanana Gusmão rejeita mós akuzasaun sira hosi Ministériu Públiku ne'ebé hatete katak kama sira ne'ebé sosa hanesan "sofistikadu tebes".

"Sofistikadu? Bele iha telefone sira hosi jerasaun ikus nian maibé kama sira hanesan sofistikadu? Kiak sira labele iha kama sofistikadu sira?", nia husu.

Juís José Maria Araújo tenta impede atu Xanana hatán pergunta hosi defeza kona-bá karik detekta hahalok ne'ebé maka la tuir lei iha asaun hosi arguida Madalena Hanjam, tanba, hafoin ko'alia tiha ho majistradu, nia hakotu ho resposta lakóniku: "La'e".

Sasin hosi Xanana Gusmão sai hanesan momentu ida ne'ebé importante iha julgamentu ne'ebé sai hanesan mediátiku liu iha istória hosi sistema judisiál timoroan nian no ne'ebé hahú iha loron 05 Outubru tinan liubá.

Bainhira hahú iha sesaun ohin loron-tersa ne'e, Xanana Gusmão hasoru ho dokumentu oioin, inklui sira ne'ebé asina hosi nia rasik, relasionadu ho desizaun ne'ebé nia foti sosa kama sira, prosesu ba provizionamentu no elementu sira seluk.

Xanana Gusmão tenki hatán kona-bá aspetu sira hanesan presiza sosa duni kama sira ne'e ka la'e, desiza hodi uza fundu kontinjénsia nian no oinsá uza no regra sira ne'ebé hala'o ba aprovizionamentu no kontratu nian.

Nia hato'o detalle ba aspetu sira tékniku liu hosi prosesu tomak, inklui oinsá foti desizaun sira ne'e, jinástika orsamentál, oinsá ezekuta no regulamentu sira ne'ebé relasionadu provizionamentu no asesu ba fundu kontinjénsia nian.

Sala audiénsia hosi Tribunál Díli nian ki'ik tebes hodi simu ema sira ne'ebé iha interese hodi akompaña sesaun, inklui membru na'in rua hosi atuál Governu, Francisco Kalbuady Lay, ministru hosi Turizmu, Arte ho Kultura, ho Cirilo Cristóvão, ministru Defeza, no jornalista barak.

Tribunál sei rona mós sasin defeza na'in tlu seluk antes la'o ba deklarasaun ikus sira.

Iha fatin seluk, falta adisiona ba prosesu informasaun balun hosi ministériu Saúde ho Finansa nian no hakotu perísia ida ne'ebé husu hosi Ministériu Públiku.

SAPO TL ho Lusa