ME SEI HALO PARSERIA HO IGREJA

Ministru Edukasaun (ME) António da Conceição informa katak, ME sei husu Igreja Katólika atu sai parseria iha área formasaun espesífiku formasaun karakter humanu.

“Ida ne’e hanoin ida ne’ebé mak di’ak tanba embora Amo Bispu foun ne’e foin mak nomeiadu maibé desde uluk ha’u ko’alia kedas atu dezevolve parseria ida ho igreja Katólika, ne’ebé ha’u hein deit katak ho Bispu foun ne’e ne’ebé mak iha ne’e ami tenki ba aprezenta lai proposta ida husi Ministru Edukasaun nian atu haree kona ba kooperasaun Igreja Katolika ho edukasaun nian,” informa Ministru António da Conceição ba Jornal Nacional Diário iha nia servisu fatin Vila Verde, Dili Segunda (2/2).

António da Conceição afirma katak, desde uluk kedas ME iha ona hanoin oinsa dezenvolve kooperasaun ho igreja kona ba edukasaun liu-liu kontribuisaun igreja nian iha parte formasaun.

Tanba dehan António da Conceição, formasaun karakter humanu ne’e tuir ME nia hanoin sei la sai edukasaun formal iha sala laran maibé nu’udar aktividade extra kurikuler ne’ebé mak presiza atu dezenvolve hamutuk.

Tanba tenik nia, kooperasaun entre ME ho Igreja Katolika ne’e nu’udar kooperasaun ne’ebé desde uluk kedas ne’ebé presiza fundamenta liu tan.ola

Jornal Nacional