FUNSIONÁRIU INVOLVE KORUPSAUN SEI HASAI

Prokurador Jeral da Repúblika (PJR) José Ximenes informa katak, agora dada’uk Gabinete Kombate Korupasaun iha ona estratejia foun ba funsionáriu públiku sira hotu katak, se mak involve an iha krime korupsaun, sei hetan demisaun husi servisu ne’ebé durante ne’e nia servisu ba.

“Agora estratégia Gabinete Kombate Korupsaun nia foun mak ida ne’e, deskobre funsionáriu bainhira involve, pena asoseria ita husu ba Tribunál para demisaun, no husu responsabilidade criminal,” informa PJR José Ximenes ba jornalista sira iha Palasiu Prezidensial Aitarak Laran Dili, Segunda (07/03), hafoin hasoru malu ho Prezidente Repúblika Taur Matan Ruak.

José Ximenes dehan, nia hasoru malu ho Prezidente Repúblika Taur Matan Ruak hodi informa kona-ba servisu Ministériu Públiku nian durante ne’e.

“Relativamente ho situasaun kriminalidade iha rai laran, no informa mós ba Prezidente Repúblika kona-ba iha tempu badak nia laran, semana ida ka rua tan hanesan ne’e, Prokurador Jeral sei ba aprezenta informasaun annual ba Parlamentu Nasionál,” katak José Ximenes.

Maibé José Ximenes dehan, tanba buat ne’e informasaun annual, entaun nia labele esplika klaru uluk ba media sira, antes reprezentante povu sira iha Parlamentu Nasionál hatene.

“Ha’u labele informa uluk, ho respeitu ba deputadu sira, depois deinformasaun, ha’u bele informa ba imi (jornalista sira), mas ita nia preokupasaun bo’ot mak komesa iha servisu fronteira, nomós iha Portu ne’ebé ita tenke proteje didi’ak,” relata José Ximenes.

iha sorumutu ne’e mós, José Ximenes informa mós ba Prezidente Repúblika kona-ba feto ida ne’ebé oho tiha ona nia laen iha Ermera.

José Ximenes dehan, kazu ne’e konklui tiha ona ninia investigasaun, i haruka tiha ona ba Tribunál.

“Iha Desembru nia laran feto ne’e oho nia laen, ba primeiru interogatóriu feto ne’e ba prizaun preventiva, i depois ikus mai ita konklui tiha ona investigasaun no akuza tiha ona,” esklarese José Ximenes.cos

Jornal Nacional