TINAN 11 JORNAL NACIONAL DIÁRIO, JORGE SERRANO: AGRADESE BA KONFIANSA PUBLIKU

Jornal Nacional Diário (JN-Diário), Segunda ohin (7/3/2016), halo nia tinan moris ba dala-11, (7 Marsu 2005-7 Marsu 2016). JN-Diário moris la’os hakarak atu kompete ho jornal nasional seluk ne’ebe iha nanis ona, maibe atu kompleta malu iha knaar haklaken informasaun ba publiku hodi kontribui ativamente ba dezenvolvimentu nasional iha ambitu demokrasia ne’ebe respeita ba valores direitus humanus.

Ohin tinan 11, JN-Diário kontinua eziste no sai referensia iha papel jornalismu ba sosiedade Timor Leste tanba konfiansa tomak ne’ebe maka povu ho ukun nain sira deposita hela hodi kotinua sai matan, tilun no ibun povu nian ba ukun nain sira no ukun nain sira ba povu.

“Uluk nanain, hakarak agradese povu tomak, leitores, asinantes, konviksoens religiojas, orgaun soberanu no sosiedade sivil iha rai ida ne’e, tanba JN-Diário ohin loron bele moris to’o tinan 11 la’os tanba hau maibe tanba konfiansa publiku nian, liu-liu esforsu ekipa tomak iha Jornal Nacional Diário ho jornalista Timor oan sira hotu nian,” hateten Fundador no Presidente do Conselho da Administração Grupo de Media Nacional (GMN/JN-Semanário ho JN-Diário), Jorge Serrano, Sabadu (5/3/2016).

Jorge Serrano hateten, maske buat barak maka lao seidauk diak, maibe kontinua halo esforsu atu hadia nafatin, tanba buat hotu mosu mai la ho perfeitu, ho nune’e, presiza hadia no parabens ba ekipa tomak iha JN-Diário no parabens ba jornalista Timor oan hotu nia esforsu tomak, liu-liu ba anusiantes ne’ebe tau fiar ba JN-Diário hodi monta sira nia publisidade iha JN-Diário hodi fo kontribuisaun boot ba ejistensia JN-Diário to’o tinan 11 ohin.

“Hau ho hau nia kaben Celia Gonçalves da Costa, hanesan nain ba GMN, maibe nain iha sura tahan deit, mas nain lolos maka jornalista sira iha JN-Diário no asinantes ho leitores sira hotu maka sai nain,” hateten Jorge Serrano.

Hanesan emprezariu nasional, Jorge Serrano afirma katak, nia nunka hakarak halo intervensaun iha JN-Diário ho JN-Semanário, atu nune’e, jornalista sira halo nia papel ho imparsial, independenti no responsabilidade.

“Hau orgulhu ho imi jornalista Timor oan nia servisu no JN-Diário ohin loron bele sai jornal referensia iha Timor Leste tanba jornalista hotu nia esforsu. Hau fiar katak, ho tinan 11 ne’e ba oin, ita sei haforsa liu tan ita nia GMN ne’ebe laos deit ba interese GMN nian mas ba interese nasional, liu-liu iha entermus deseminasaun informasaun ba povu tomak,” hateten Jorge Serrano.

Jorge Serrano nia hakarak maka JN-Diário ho JN-Semanário ne’e tenke sai nain ba povu tomak nian, nune’e bele fasilita povu hotu, atu hato’o no simu informasaun ne’ebe kredibel, imparsial no faktus.

Kompara ho idade ema nian karik, Jorge Serrano hateten, tinan 11 ne’e hanesan labarik ida ne’ebe komesa hakat, haree no senti diak no at.

Nia hatutan, maske dezafiu no tentasaun barak sei mosu, mas importante liu maka jornlista sira tenke serbisu ho imparsial nafatin atu bele hakur liu tentativa ho dezafius sira ne’ebe atu mosu mai.

Ho Maromak Nia tulun, Jorge Serrano garante katak, iha tinan ne’e bele habot liu tan GMN hodi reforsa tan GMN ba interese povu nian. Tanba ne’e, ekipa tomak JN-Diário ho JN-Semanário, liu-liu jornalista sira tenke komunga katak, jornalista ne’e laos profisaun deit mas vokasaun.

Nudar nain ba GMN, Jorge Serrano, urgulho boot ho jornalista Timor oan sira nian, tanba mesmu ho kondisoens minimu, maibe kontinua serbisu hodi kontribui ba prosesu harii Estadu no nasaun (Nation Building and State Building).

“Hau deposita hau nia konfiansa tomak ba jornalista Timor oan, liu-liu jornalista sira iha GMN. Hau fiar katak ita sei halo buat boot liu ba interese nasaun tuir ita nia motto Hamutuk Haklaken Lia Los, atu kontinua hetan fiar boot liu tan husi povu,” hateten Jorge Serrano.

Iha tinan 11 JN-Diário nian ne’e, Jorge Serrano husu atu loke an no lori ema hotu mai hamutuk ho JN-Diário atu ejerse sira nia pensamentu politiku, sosial, edukasaun no ekonomia, atu nune’e, JN-Diário ne’e sai ema hotu nian. La bele ba deit grupu ida, koor ida, politiku ida no relijiaun ida. Atu dehan deit katak, JN-Diário ne’e ba publiku tomak no Timor oan hotu nian.

Tuir nia hatene, jornal barak maka moris iha Timor, mas balun tenke taka (mate). Infelismente, Jorge Serrano, lakohi buat sira ne’e tenke akontese. “Se ohin ita moris to’o tinan 11 tanba konfiansa publiku nian no ba dala uluk agradese tebes ba Nai Maromak ho mate bian sira hotu,” hateten Jorge Serrano.

Jorge Serrano ho orgulhu hateten, iha tinan 11 ne’e, JN-Diário kontribui halo estoria balun ona no iha arkivu barak ba situasaun hotu iha rai laran, hanesan situasaun politika, defeza, seguransa ekonomia, sosial no religioja nian.

Kona-ba expetativa no esperansa povu nian ba JN-Diário atu bele kobre informasaun nasionalmente, Jorge Serrano hateten, expetativa ho esperansa povu nian ne’e sai hanesan objetivu boot GMN nian ne’ebe kontinua tenta investe maka’as atu JN-Diário ho JN-Semanário bele halo kobertura nasional no distribuisaun informasaun nasional.

“Ita iha dezafiu balun no ita tenta ona atu tinan ne’e tenke estabelese ajensia iha munisipiu hotu-hotu. Tanba ne’e, hau nia mensajen ba ekipa redasaun JN-Diário ho JN-Semanário, hahuu husi Diretor Jeral Jose Gabriel, Xefi Redasaun Aleixo Ximenes no ekipa tomak iha GMN atu loke an to’o munisipiu no se bele to’o sukus hotu-hotu,” afirma Jorge Serrano.

Nia dehan, nudar jornal nasional tenke iha kobertura nasional no distribuisaun informasaun nasional. Katak, buat ne’ebe maka povu ki’ik koalia tenke to’o orgaun soberanu sira no orgaun soberanu sira nia mensajen no desizaun tenke to’o povu ki’ik sira liu husi JN-Diário ho JN-Semanário.

“Hau promete ba povu tomak katak, GMN sei halo esforsu hotu via jornal no via kanal seluk atu lori informasaun ne’ebe kredibel ba povu sira hotu iha baze. Expetativa no konfiansa povu nian ba GMN nudar dezafiu ba ami tomak iha GMN hodi bele halo kobertura nasional no distribuisaun informasaun nasional,” hateten Jorge Serrano. Sel

Jornal Nacional