PR TAUR MISA PASKUA IHA IGREJA MOTAEL

Prezidenti Repúblika (PR) Taur Matan Ruak, ho Primeira Dama, Isabel Ferreira i nia oan sira partisipa misa paskua nian hahú husi Kinta feira Santa, Sesta feira Santa, Sabadu alleluia no Dominggo resurisaun iha Igreja Motael.

Selebrasaun misa paskua iha igreja Motael lahanesan ho tinan sira ne’ebé liu ona, tanba Eskuta no THS-THM sira la husik sarani sira atu hamrik iha estrada ibun ka iha jardim igreja Motael nia oin.

Sarani sira mós kumpri orden ida ne’e, maske hamriik sena malu iha loron manas laran, sarani sira hotu tama ba área igreja nian hodi partisipa misa selebrasaun paskua nian.

Bainhira haree área igreja nian hamriik ladi’ak ona, hafoin eskuta sira permiti sarani sira atu hamriik iha estrada ibun hodi tuir misa paskua nian.

Igreja Motael nia eskuta sira mós la permiti feto sira hatais roupa liman tara, no mane sira ne’ebé tau bringkus atu tama ba igreja laran. Bainhira eskuta sira haree feto hatais roupa liman tara ka kotuk molik, no mane uza bringkus, eskuta sira haruka fila kedas.

Misa Kinta feira Santa iha Igreja Motael, prezide husi Amo David Alves. Iha misa Kinta feira Santa ne’e mós Amo David Alves fase joven na’in 12 sira nia ain, hanesan Jesus fase apostolu sira nia ain iha momentu ne’ebé Jesus han dala ikus ho nia apostolu sira.

Misa Sesta feira santa, laiha misa maibé iha deit liturjia da palavra ne’ebé prezidi husi Amo David Alves. Iha liturjia da palavra ne’e, iha Sesta feira santa nian, la sinal cruz hanesan ita halo iha misa Domingo-Domingo nian ne’ebé sempre hahú no taka ho Sinal da Cruz, laiha kanta entrada nian, inklui laiha hakneak hanesan iha Sábadu Santo no Domingo da Resurisaun, tanba laiha santíssimu iha sakráriu laran.

Misa Domingo resurisaun, iha igreja Motael prezide husi Bispo Diocese Dili, Dom Virgilho do Carmo da Silva.

Iha esplikasaun, Bispo Diocese Dili, Dom Virgilio do Carmo da Silva hatete katak, selebrasaun paskua ne’e, la’os atu hanoin de’it ba Jesus nia mate, maibé paskua ne’e atu hafoun sarani sira nia fiar, no sarani ida-ida mós tenke hanoin ida-ida nia fiar.

Dom Virgilio dehan, paskua ne’e atu sarani ida-ida hafoun nia moris, no hametin nia fiar.cos

Jornal Nacional