Hakarak ba Inglaterra, lalika foti risku

DILI—Vise Ministru Negosiu Estranjeiru no Kooperasaun (MNEK), Roberto Soares hatete, ba timor-oan  sira ne’ebé mak dadauk ne’e kontinua hakarak atu ba Inglaterra  hodi buka servisu keta foti uluk risku, maibé akompaña uluk evolusaun ba rezultadu referendum ne’ebé mak iha dia 23 de Junnu povu Inglaterra  hili rasik hodi sai hosi Uniaun Europeia.

“Kuandu laiha garantia, di’ak liu ita lalika foti uluk risku, ita mós tenke akompaña evolusaun polítika ida ne’e, depois bainhira ita ba, ita ba para hetan buat ne’ebé di’ak atu aprofunda liu mehi no interese bainhira ba servisu iha rai seluk,”Vise Ministru Negosiu Estranjeiru no Kooperasaun (MNEK), Roberto Saores informa ba jornalista sira iha salaun MNEK, Praia dos Coqueirus, Dili, Kuarta, (29/06) hafoin hala’o deskusaun ho Igreja Katolika Timor-Leste sobre akordu governu ho Santa-Sé.

Maske nune’e vise xefe diplomata hatete, nia parte labele hatete ba ou labele ba, tanba la’ós  governu mak garantia servisu tanba timor-oan  sira ne’ebé ba ne’e ho grupu ne’ebé organiza-án no balun la’o ho individuálmente, to’o iha Inglaterra  mak foin buka servisu.

Vise Ministru ne’e husu presiza halo koordenasaun no konsulta ho ema ne’ebé mak organiza no karik timor-oan  ba tan presiza kondisaun fatin hodi nune’e bele iha garantia.

Timor-oan  hotu tenke konsiente katak iha rejiaun Asia no Europa la hanesan, iha kontekstu ne’ebé diferensia tebes, tanba ne’e kualker desizaun ne’ebé iha presiza tetu didi’ak hodi nune’e bele fó benefisu labele fó risku ba timor-oan  sira.

Povu Britania maioria mak deside para sai hosi Uniaun Europeia, ne’e direitu povu Inglaterra  nian. Timor-Leste la intervene iha polítika doméstika Inglaterra  ninian.

Tanba ne’e iha kedas momentu povu Inglaterra  prepara ba votasaun, MNEK orineta kedas embaixadór iha Inglaterra  ni mós iha Portugal hodi akompaña evolusaun ne’e no akompaña situasaun komunidade timor-oan  iha Inglaterra , hodi nune’e bele fó asistensia ka apoiu tuir nesesidade ne’ebé mak timor-oan  infrenta.

“To’o ohin loron ita seidauk haree iha ninia impaktu dramátika ida ba ita nia komunidade timor-oan  ne’ebé mak servisu iha Inglaterra  no iha Irlandia,”Vise MNEK hatete.

Dadauk ne’e Inglaterra  rasik mós sei iha deskusaun interna para ofisializa desizaun hodi sai hosi Uniaun Europeia, tanba ne’e Inglaterra  sei konsetra hela ba asuntu ne’e.

Bainhira sai ona hosi UE mak Inglaterra  sei haforsa sira nia kooperasaun ho pais sira seluk, bilaterálmente. Timor-Leste ho Inglaterra  nia relasaun estabelese ona desde 2002, tanba ne’e relasaun Timor-Leste no Inglaterra  ne’e exselente teb-tebes.

Desde 2004, Timor-Leste hetan oportunidade di’ak hodi asesu ba Inglaterra , uza pasaporte Timor-Leste nian para halo aktividades vizitas tempu badak ho visa livre.

“Ita iha relasaun di’ak teb-tebes ho Inglaterra  tanba ne’e ha’u fi’ar  katak sei la mosu situasaun extra-ordinaria ida ne’ebé dramátika liu atu fó impaktu ba timor-oan  sira iha Inglaterra ,”vise xefe diplomata dehan.

Vise xefe diplomata ne’e apelu ba timor-oan  iha Inglaterra  mak presiza halo kontaktus, komunikasaun ho embaixador sira hodi hato’o buat ne’ebé mak karik presiza para embaixada sira bele halo hodi fó apoiu ka protesaun konsulár ninian.

Vise Ministru hatutan timor-oan  iha Inglaterra  lalika ta’uk no dramatiza situasau, tanba prosesu sira ne’ebé mak akontese ne’e la’ós  prejudika kompletamente ba ekonómika mundiál ninian.

Oras ne’e dadauk iha erra ida ne’ebé avansadu tebes ho téknologia oioin, bele utiliza téknologia sira ne’ebé iha hodi haforsa liu tan kooperasaun.(dgx)

Timor Post