PADRE ANTÓNIO EDUARDO DE PAULO BRITO - D. Ximenes Belo, opiniaun

Nia moris karik, Iha loron 28 fulan juñu tinan 2016, amo lulik Brito halo tinan atus ida. Sarani sira hosi Paróki Balide prepara daudaun atu selebra amo Padre Brito nia-nia centenário. Maibé, ha’u hanoin, laós sarani Balide de’it, maibé, sarani sira hosi Município Baucau, Município Manatuto no Município Aileu, no paroki Becora, parokia Motael, parókia Dare,  parókia Comoro, no parókia Katedral (Vila Verde) iha mos obrigasaun atu hanoin hikas amo lulik Brito nia asaun missionária no evenjelizadora iha rai Timor Loro Sa’e.

Reverendo Padre António Eduardo de Brito, moris iha loron 28/6/ 1916, iha rai Cuncolin, Goa (Estado da Índia Portuguesa). Nia simu ordensaun sacerdotal iha loron 16 fulan abril tinan 1944. Hanesan amo lulik nia serbisu hanesan vigário cooperador iha Margão (Goa). Iha loron 6 fulan maio tinan 1947, nia simu surat provisão atu sai missionáriu, no ba serbisu iha Diocese Dili, Timor Português.

Nia serbiu iha fatin barak: Ermera, Manatuto, Baucau, Aileu, Remexio, Balide. Padre Brito, amu lulik ida ké serbiu mak’as ba Igreja no ba Rai Timor Loro Sa’e. Iha Manatuto nai hadia igreja Manatuto; Iha Baucau, nia haruka halo igreja ida (maiské proviszória) iha Vila Salazar iha tinan 1958. Hanesan pároku Bailide nian, nia halo igreja iha Balide, igreja iha Remexio, Igreja iha Aileu no ikus mia, tulun harii Igreja Catedral iha Vila Verde (Díli). Iha vida Diocese Dili nian, nia halo parte, dala barak, ba Conselho Presbiteral. Iha niania moris hanesan amo lulik, nia  sarani ema wa’in tebes; fo kaben ba ema rihun ba rihun; prepara labarik riuhun ba riuhn ba Primeira Comunhão no Crisma; vizita moras sira hodi fó sakramentu mina sarani. Iha área eduaksauan, nia tau matan ba Eskola Misaun nian. Harii SMPK iha Bailde no Aileu. Ikus mai, bainhra nia hamos daudan ai-funa iha jardim parokia nian, iha Balide, Nai Maromak bolu nia ba lalehan iha loron 13 fulan agosto tinan 1999. Ami timor oan tomak sente triste tebes no tanis maka’as, tanba  amo lulik diak ida ne’e nia serbisu no dedikasuan ba sarani no povu Timor Loro Sa’e.

Atan há’u agradese tebes ba Padre Brito, tanba nia tulun há’u halo primeira confissão no primeira comunhão iha tinan 1959, iha Vila Salazar. Ikus mai, há’u hanesan Administrador Apostólico Diocese Dili nian, Padre António de Paulo Brito kontinua fo apoio maka’as, atu ukun didiak Diocese Dili…

Muito obrigado, Padre Brito! Hosi Lalehan, reza nafatin mai ami tomak.

Porto, 28 de junho de 2016

Dom Carlos Filipe Ximenes Belo

Jornal Nacional, opiniaun