Prezidente Giné Ekuatoriál nian kansela vizita ba sede CPLP nian

Prezidente Giné Ekuatoriál nian kansela vizita ba sede CPLP nian, iha Lizboa, ne’ebé prevee ba loron-sesta, no "iha tempu badak" sei haruka misaun ida hodi prepara dezlokasaun ba Portugál, hatete sekretáriu-ezekutivu organizasaun nian ba Lusa ohin. 

"Prezidente Giné Ekuatoriál nian sei lakonkretiza", afirma responsável Komunidade Nasaun Lia-portugés nian (CPLP), Murade Murargy, no refere katak Teodoro Obiang Nguema justifika katak nia iha "kondisaun" ne’ebé labele sai hosi nasaun tanba forma hela nia Governu, hafoin eleisaun 24 abril.

Fonte CPLP anunsia ona, iha inísiu semana ne’e, katak Prezidente equato-gineense sei vizita sede organizasaun nian iha loron-sesta ne’e, resesaun ne’ebé prepara ona, maski sekretáriu-ezekutivu laiha konfirmasaun ofisiál, hanesan hatete ba Lusa iha tersa ne’e.

"Hafoin forma tiha Governu, nia sei haruka misaun ida ba Portugál hodi halo loos buat hotu kona-ba vizita" ho autoridade portugeza sira, tenik Murargy, ne’ebé mós hatete katak lahatene kona-ba konteúdu hosi vizita ne’ebé Teodoro Obiang hakarak halo ba nasaun ne’e.

Murade Murargy mensiona katak Obiang "relijiozu tebes" no hakarak vizita Santuáriu Fátima no rekorda katak, hafoin Giné Ekuatoriál tama tiha ba CPLP, iha tinan rua liubá, Prezidente hatudu katak nasaun dahuluk ne’ebé nia hakarak vizita mak Portugál.

SAPO TL ho Lusa