PR APRESIA KONTRIBUISAUN SAUDOZU LEKI SERRA

Prezidenti Repúblika (PR), Taur Matan Ruak apresia tebes saudozu Germenino A. dos Reis alias Leki Serra, nia kontribuisaun ba Timor Leste, husi tempu funu mai to’o tempu independensia.

“Ita lakon ema di’ak ida, i ha’u pesoalmente apresia ninia servisu no ninia kontribuisaun, li-liu iha momentu ne’ebé nia kandidatu ha’u nia an ba Prezidenti Repúblika, ami nain rua fó volta Timor laran ne’e tomak, para bele ko’alia ba sidada’un sira kona-ba ami nia mehi, ami nia hanoin ba Timor,” dehan Taur Matan Ruak iha nia diskursu, hafoin misa solene saudozu Leki Serra nian, ne’ebé hala’o iha Kapela Nosa Senhora da Grasa Gleno Ermera Dili, Sesta (15/07).

Xefi Estadu ne’e dehan, sira nain rua saudozu Leki Serra nia mehi ida de’it, Timor-oan sira tenki kontribui, labele ema ida mesak mak fó nia kontribuisaun, husi beik to’o matenek, husi ki’ak to’o riku, husi ferik to’o foin sa’e, hot-hotu tenki fó nia kontribuisaun mak nasaun ne’e bele ba oin.

“Iha momentu ne’ebé ita nia nasaun persija nia, nia nunka nega ninia partisipasaun, la’os de’it iha tempu ita halo funu, mas iha tempu ukun an, nia fó ninia kontribuisaun tuir ninia posibilidade,” relata Taur Matan Ruak.

Xefi Estadu ne’e dehan, durante saudozu Leki Serra nia moris, nia sempre fó nia kontribuisaun ba dezenvolvimentu nasaun Timor Leste nian.

“Nia isin lolon mak mate, maibé nia klamar lamate, i nia memoria la mate, buat di’ak ne’ebé nia halo no fó, ida ne’e mak halo ita hanoin nia, ita hotu iha ne’e ita deve ninia kontribuisaun,” katak Taur Matan Ruak.

Xefi Estadu ne’e mós husu ba oan ki’ak sira atu labele triste, tanba sira la mesak, Estadu Timor Leste sei nafatin ho sira. Xefi Estadu ne’e mós husu ba familia matebian nian atu kontinua nafatin banati tuir saida mak Leki Serra ho nia kaben hanorin tiha ona ba sira.

“Ha’u lori ha’u nia familia nia naran agradese ba familia Leki Serra, i hanesan Prezidenti Repúblika, lori nasaun no povu tomak nia naran, agradese imi, tanba imi bele hetan aman ida di’ak, generozu tebes para bele fó ninia vida no partilla nia moris ba ita nia nasaun no povu,” relata Taur Matan Ruak.cos

Jornal Nacional