Halo Lei Tenke Kuidadu

DILI, (ANTIL) – Futuru, estudante Universidade Nasionál Timor Lorosa’e (UNTL), Fakuldade Direitu (FD) bainhira halo lejislasaun tenke ho kuidadu no labele copy paste.

“Ami estuda direitu no loron ida bele halo lei iha Timor-Leste, alerta ba estudante bainhira halo lei no lejislasaun iha loron ruma bele ho kuidadu no labele halo copy paste”, Dekana Fakuldade Direitu UNTL, Maria Ângela Carrascalão ba ANTIL iha Ótel Timor, Segunda, (5/9).

Dekana ne’e hatutan, elabora lei tuir realidade TL nian labele kria bebeik komisaun reforma lejislativa, maibé só kria de’it bainhira tinan 15 ka 16 indepedénsia hodi haree lei balun ne’ebé maka karik balun ita halo ho lais.

Fakuldade konvida Prezidente Komisaun Reforma Lejislativa (KRL) no Setór Justisa TL, Jorge da Graça halo palestra kona-ba lejislasaun ba estudante direitu durante loron ida.

Palestra ne’e, Jorge Graça halo esplikasaun kona-ba kódigu sivil, lei komersiál no rezolusaun konflitu. KRL iha parte kódigu sivil sira halo akonsellamentu iha reforma ne’ebé la’o hela kona-ba kazamentu no halo identifikasaun no rekomendasaun ba realidade nasionál.

Kona-ba lei komersiál mak partisipa iha komponente jurídika reforma ekonómika, análiza kódigu komersiál no lei avulsa iha vigór liliu kona-ba kontratu, garantia no lei uniforme nune’e mós rekomenda metodólojia no konteúdu reforma.

Rezolusaun konflitu ne’e kona-ba pluralidade juridíka no asesu ba justisa liliu analiza justisa estatál no kostumeira (relasaun no tendénsia), promove dezenvolvimentu tribunál judisiál (imparsialidade, indepedénsia, efikásia, formasaun no jestaun), fórmula polítika no garante legál ne’ebé valoriza justisa kostumeira.

Nia informa, KRL harii iha loron 16 Dezembru 2015 tuir rezolusaun governu no 30/2015.

Iha fatin hanesan, estudante FD, Alfonso Costa hatete, esplikasaun ne’e nu’udar akadémiku bele fasilita sira nia estudu liuliu aumenta koñesementu kona-ba elabora traballu akadémiku hanesan, proposta, relatóriu, monografia nomós seluk tan. Tanba ne’e nia hatete, palestra ne’e di’ak ba estudante sira. (jornalista: Rafy Belo; editora: Rita Almeida)

Foto: Prezidente Komisaun Reforma Lejislativa (KRL) no Setór Justisa TL, Jorge da Graça. Foto espesial