PD Fahe Informasaun Lideransa ba Estudante Siénsia Polítika

DILI, (ANTIL) – Partidu Demokrátiku (PD) liuhusi nia Sekretáriu Jerál, Mariano Sabino Asanami fahe informasaun lideransa ba estudante departamentu Siénsia Polítika, Fakuldade Siénsia Sosiál, Universidade Nasionál Timor Lorosa’e (UNTL) hodi mellora estudante sira nia hanoin atu sai líder ne’ebé mak di’ak iha futuru.

“Universidade fatin ne’ebé mak fó informasaun, aprende no asegura nasaun ne’e ba oin,” Sekretáriu Jerál PD, Mariano Sabino Asanami perante estudante siénsia polítika iha Kampus Kaikoli, Kinta, (20/10).

Sekretáriu Jerál ne’e hatutan tan, universidade no estudante presiza hatene programa partidu no saida mak partidu tan funsaun partidu nu’udar instrumentu ba kadernizasaun.

“Informasaun nu’udar instrumentu hodi luta ba povu no sosiedade. Akademia mak fatin ida ne’ebé neutru liu no sai fatin hodi analiza “tasak” atu haree ba partidu no nia lider sira,” nia hateten.

Iha nia intervensaun, Sekretáriu Jerál PD ne’e mós akresenta katak Polísia Nasionál Timor-Leste (PNTL) no FALINTIL–Forsa Armada Libertasaun Nasionál (F-FDTL) hala’o funsaun públika, nu’udar instrumentu ne’ebé serve ba povu, nune’e labele partidariza.

“Partidu polítiku eziste nu’udar instrumentu hodi serbi estadu, estadu ne’ebé mak sai hanesan ema hotu nian,” nia akresenta. Hodi hatutan, ema ne’ebé iha baze bele sai “Ai kakeu” tanba ita-nia kondisaun, maske ema matenek maibé iha partidu ema la uza, la hetan buat ida ho nune’e ema hili dalan seluk.

Ho nune’e, nia hateten ba estudante sira katak hanesan jerasaun uluk sira iha esperansa boot ba jerasaun foun ne’ebé iha idaidak nia fatin hodi serve nasaun ne’e.

“Labele haree ba ida ne’ebé mak uluk ka di’ak liu ou eroi liu. Jerasaun foun imi iha dezafiu ida ne’ebé própriu no lori nasaun ne’e ba oin,” Sekretáriu jerál ne’e husu. Jerasaun foun tenke iha nia dezafiu rasik no iha responsabilidae rasik.

Iha fatin hanesan, estudante, Rumão Piedade Mendonça apresia tebes ba prezensa partidu politiku sira hodi bele mai fahe informasaun kona-ba programa politiku no oinsá atu sai lider ne’e di’ak no fó informasaun kona-ba luta lideransa sira nian iha tempu okupasaun Indonézia no klandestina.

“Ami kontente ba lideransa ne’ebé ho hanoin di’ak mai fahe ninia matenek hodi ami bele prepara ami nia-án no bele lori buat di’ak ruma ba sosiadade no nasaun ida ne’e,” hateten estudante Rumão Piedade.

Nia hatutan katak tanba situasaun ne’ebé agora la’o, ema barak haree liu ba figura, laharee ba progama partidu nian ne’ebé mak atu dezenvolve rai ida ne’e.

Estudante Rumão Piedade mós akresenta, estudante nu’udar ajente transformativu no presiza rona komprimisiu partidu polítiku sira nune’e bainhira hetan ukun partidu politiku sira la-kumpri sira nia komprimisu ne’e, estudante sira labele nonok hodi fó opiniaun ba partidu sira hodi realiza nia komprimisiu hodi bele kontribui ba dezenvolvimentu nasionál.

Prezensa Asanami tanba hetan konvite husi estudante Departamentu Polítika Públika, Fakuldade Siénsia Sosiál, UNTL no hetan partisipasaun másimu husi estudante sira.

Iha biban ne’e marka mós prezensa husi lider ka Portavoz Ofisiál Partidu Libertasaun Populár (PLP), Abel Pires da Silva hodi hato’o mós nia intervensaun. (jornalista: Rafy Belo; editora: Rita Almeida)

Foto: Mariano Sabino