PR Lá Fiar Konsellu Veteranu Bele Rezolve Problema Veteranu

LUCULAI, (ANTIL) - Prezidente Repúblika (PR), Taur Matan Ruak la fiar, katak, bainhira harii Konsellu Veteranu no Kombatente, bele rezolve veteranu no antigu kombatente sira-nia problema.

Taur hato’o kestaun ne’e iha Suku Luculai, Postu Administrativu Liquiça Vila, Munisípiu Liquiça, bainhira hatan pergunta husi Francisco da Costa, veteranu, ne’ebé husu ba Prezidente atu harii Konsellu Veteranu no Kombatente iha Munisípiu Liquiça, atu hadi’a no haloos veteranu sira-nia dadus.

Iha tempu liu-ba, Taur haktuir,  Governu aprezenta Estatutu Konsellu Veteranu no Kombatente atu promulga, maibé  Prezidente Republika rejeita tanba kria problema.

Nia husu ba Governu atu harii hikas estrutura rezisténsia iha munisípiu ida-idak, nune’e bele identifika loloos sé maka veteranu no Kombatente. “Kuandu lá halo ida-ne’e, defisil tebes atu rezolve problema veteranu,” Taur dehan iha diálogu ho Komunidade Suku Luculai, Kinta (20/10).

Antes ne’e, mosu problema iha Maliana, Munisípiu Bobonaro no Ossu (Viqueque). Iha Maliana, ema seluk ne’ebé la’ós veteranu, rejista tiha fali veteranu ida nia naran hodi simu osan. Iha Suku Liaruka (Ossu), ema ne’ebé serbisu hamutuk ho Militár Indonézia, tau nia naran nu’udar veteranu hodi simu osan.

Iha oportunidade ne’e, veteranu Francisco da Costa mós preokupa no husu klarifikasaun ba Xefe Estadu ba  veteranu sira ne’ebé ho eskalaun 03 no 04, la hetan direitu osan.

Prezidente Taur esplika, Lei Veteranu no Kombatente maka defini hanesan ne’e. Maibé, sé eskalaun 03 no 04 hakarak hetan hotu subsídiu, tenke muda lei.  Parlamentu Nasionál maka iha kompeténsia muda lei, la’ós Prezidénsia Repúblika. (Jornalista: Xisto Freitas/Editór: Otelio Ote)

Foto: Prezidente Repúblika, Taur Matan Ruak diálogu ho komunidade Suku Luculai, Kinta (20/10). Foto ANTIL/Xisto Freitas