POSTING LIA AAT IHA FACEBOOK, KATEGORIA KRIMI SEMI PUBLIKU

Dala wain, ema barak utiliza facebook hodi trata malu no hasai lia fuan aat ba malu to’o tau video ho foto aat. Maibe, sira la senti katak, sira nia atetude ne’e bele hetan kondenasaun krimi semi publiku.

Juventude nain 3; Fernanda Domingas Araujo, Nuno Freitas ho Graciana Gomes, Kuarta (19/10/2016), tenki hasoru malu iha Tribunal Distrital Dili (TDD), tanba deit, Fernanda nia kolega nain 2, Nuno ho Graciana, posting lia aat iha estatus facebook hodi soe piadas ba Fernanda.

Antes hala’o julgamentu  iha Tribunal, juis prosesu Eusebio Xavier halo uluk tentativa rekonsiliasaun, tanba krime devaza  artigu 131 tuir kodigu penal kategoria ba krime semi publiku, nune’e lei fo dalan atu halo rekonsiliasaun antes tama ba julgamentu.

Iha tentativa rekonliasaun ne’e Fernanda ne’ebe Ministeriu Publiku (MP) notifika hanesan leza  deklara hakarak dada fali kazu ne’ebe kontra Nuno ho Graciana, ne’ede MP notifika hanesan arguidu.

Inflelismente, lezada Fernanda husu ba arguidu nain rua tenki husu deskulpa ba nia hodi rekopera nia naran diak. Nune’e, arguidu Nuno deklaramente  prontu husu deskulpa ba lezada, maibe nia husu ba lezada labele halo tan hahalok atu posting malu at iha facebook.

‘’Lezada Fernanda ne’e hau nia mandul (mantan dulu), nia sempre uza numeru telefone foun hodi sms tolok hau no hateten at hau no nia posting at hau iha facebook. Hau nia oin ne’e familiar los ona iha media sosial, hau dehan ba nia, maske ita namora kleur maibe kuando iha problema ida atu la cocok, entaun ita tenki fahe malu i nia hatene hau nia uma, nusa iha problema la ba deit hau nia uma, tenki posting malu at iha media sosial,’’ deklara arguidu Nuno ba tribunal.

Iha fatin hanesan arguida Graciana hatete, nia posting at duni lezada iha facebook, maibe ida ne’e mos tanba lezada mak posting nia at uluk iha facebook hodi hatete ba ema katak  Graciana ho Nuno iha relasaun sub-subar.

Hafoin rona hotu deklarasaun husi parte arguidu, juis prosesu Eusebio husu ba arguidu nain rua atu hamrik hodi husu deskulpa ba lezada Fernanda, nune’e arguidu Nuno mos hamrik hodi husu deskulpa ba lezada Fernanda no husu ba lezada mos labele halo tan hahalok ne’ebe mak gosta posting at malu iha facebook no husu ba ba lezada atu kria relasaun diak ho Nuno hanesan amigo diak.

Arguida Graciana mos hamrik husu deskulpa ba lezada Fernanda no espera problema entre sira nain rua sei la iha tan no problema ne’e hotu ona iha tribunal.

Hafoin arguidu ho lezada dame malu tiha ona, tribunal deside homologa ou taka prosesu ba krime devaza kontra arguidu Nuno ho Graciana no sei la kontinua ba julgamentu.

Audensia ne’e prejidi husi juis singular Eusebio Xavier, Ministeriu Publiku (MP) reprezenta prokurador Jose Elo, arguidu nain rua hetan asistensia legal husi defensor publiku Humberto Hugo.nia

Jornal Nacional