Estádiu Malibaka, Sai Uma Na'in Super Taça

DILI: Liga Futeból Amadora (LFA) hasai ona desizaun ba fatin kompetisaun Super Taça, ne'ebé sei realiza iha Estádiu Malibaka, Maliana.

Desizaun ne’e fó sai hosi Vise Prezidente Liga Futeból Amadora (LFA), Alexander Vong iha edifísiu LFA, Estádiu Munisipál Dili, Kinta (17/11).

"Bazeia ba reuniaun, LFA deside ona Estádiu Malibaka, Maliana sai uma na'in ba jogu Super Taça entre manan nain Primeiru Liga LFA, Ad.SL. Benfica kontra manan nain Taça 12 de Novembru As. Ponta Leste," dehan Alexander Vong.

Vong mos dehan, Jogu Super Taça ne'e hanesan parte ensera ba Kompetisaun Liga Futeból Amadora epoka 2015/2016 no hanesan mós abertura ba Kompetisaun Epoka 2016/2017.

Super Taça rasik ne'ebé sei realiza iha Estádiu foun Malibaka, Munisípiu Maliana ne’e sei realiza iha, Sesta 25 Novembru 2016 Tuku: 15.00 OTL. (*)

Frei Belo - Editór: Alexandre Assis. Ola Timor – Foto: Press konferensia LFA, Kinta (17/11) kona-ba desizaun Estádiu Malibaka, Maliana ne'ebé sai uma na'in ba Kompetisaun Super Taça. (Olatimornews Foto/Frei Belo)