Lere Simu Karta Reforma, PM Rui Rezeita

DILI – Xefi Estadu Maior Jeneral F-FDTL Maijor Jeneral Lere Anan Timur, deklara ona ba publiku katak nia simu ona karta husi estadu atu reforma iha 28 Novembru 2016, maibe Primeiru Ministru (PM) Rui Maria de Araujo rezeita, tanba estende Maijor Lere nia mantatu too 2017, laos simu reforma agora.

Lia hirak nee hatoo husi PM Rui, ba jornalista sira iha nia knar fatin, hafoin remata nia serbisu, iha Palasiu Governu, Sesta (18/11/2016).

Lere simu karta husi estadu atu reforma iha 28 Novembru nee hau hanoin lalos, tanba Prezidente horibainhira dehan tiha ona nia mantadu estende too 2017, dezisaun foti tiha ona, nusa maka agora simu tan fali karta, nee hau hanoin lalos,” hateten PM Rui.

Xefi Governu wainhira rona informasaun nee nia hakfodak, tanba nia la hatene, maibe nia fiar katak buat sira nee sei la akontese, tanba Maijor Lere nia mandatu too 2017.

Iha parte seluk Xefi Estadu Maior Jeneral F-FDTL Maijor Jeneral Lere Anan Timur mos deklara ona ba publiku kata nia simu ona karta reforma husi estadu, katak reforma iha loron 28 Novembru tinan nee, wainhira selebra loron proklamasaun indepedensia.

Iha Tinan ida nee ami hetan reforma lubuk ida, tanba ami atinzi ona ba 60 anus, ida nee ami simu tanba tuir lei neebe iha,” hateten Lere.

Lere mos haklean tan katak reforma nee laos sai problema, maibe problema maka jersaun foun sira tenke kaer metin institusan hodi kria paz no estabelidade iha pais ida nee. Informasaun kompletu iha STL Jornal no STL Web, edisaun Sabado (19/11/2016). Joao Anibal

Suara Timor Lorosae