Estudante universitáriu sira protesta hasoru planu sira deportasaun Donald Trump nian

Estudante universitáriu sira Estadus Unidus nian protesta ona iha loron-kuarta ne'e, iha kampus sira iha nasaun tomak, hodi husu ba administrasaun sira hosi universidade sira atu proteje alunu no funsionáriu sira hasoru polítika sira imigrasaun nian durante Donald Trump nia prezidénsia. 

Organizadór sira - ne'ebé hetan apoiante sira iha rede sosial sira ho etiketa ('hashtag') #SanctuaryCampus - fó hatene ona atividade iha eskola hamutuk 80 resin, inklui iha Faculdade de Middlebury iha Vermont, ne'ebé alunu na'in 400 resin halibur hamutuk no iha Universidade Yale ne'ebé halibur manifestante na'in 600 resin.

Estudante sira buka garanti atu sira nia eskola sei la fahe informasaun pesoal sira ho serbisu sira imigrasaun nian ka permiti entrada ba ajente sira Imigrasaun nian ka Alfándega nian iha kampus sira.

"Imi konsege imajina tauk ne'ebé maka bele mosu iha kampus universitáriu bainhira iha ajente sira Imigrasaun nian ka Alfándega nian la'o iha kampu sira ho ‘status quo’? Sei hanesan teror ida", hatete hosi Carlos Rojas, organizadór ida, hosi grupu Movimiento Cosecha.

Protestu sira ne'e mosu iha loron konsekutivu sira hafoin iha manifestasaun sira iha sidade oioin iha nasaun ne'e, hafoin Trump manán eleisaun prezidensial sira iha loron 08 Novembru.

Entre promesa eleitoral sira hosi republikanu ne'e iha deportasaun ba ema millaun resin ne'ebé hanesan ilegal iha Estadus Unidus.

"Ha'u ta'uk tebes", hatete hosi Miriam Zamudio, ne'ebé ba Estadus Unidus bainhira nia sei ki'ik ho aman-inan sira ba ajénsia notísia Associated Press (AP) bainhira prepara hela hodi partisipa iha protestu ida iha Universidade Rutgers, iha Nova Jérsia.

Zamudio hatete katak senti preokupadu tanba informasaun ne'ebé nia nia fó iha kandidatura ida bele halo nia aman-inan sira hetan risku tanba sira hela iha nasaun nian lahó autorizasaun.

"Ami la hatene saida maka Trump sei halo. Ami la hatene katak sei eziji informasaun ne'e no ami hakarak atu administrasaun no ami nia eskola bele apoia ami", nia hatete.

Ema atus resin, barak maka alunu sira hosi ensinu sekundáriu no universitáriu, halibur hamutuk iha edifísiu federal iha sentru San Diego hodi halo protestu hasoru eleisaun Trump nian. Balun kaer kartaz ho fraze sira ho fraze “We are not criminals” (“Ami la'ós ema kriminozu”) ho “Make racists afraid again” (“Imi halo atu ema rasista sira ta'uk fila fali”).

Fakuldade no funsionáriu sira hosi universidade oioin asina ona petisaun sira hodi apoia ideia hodi halo kampus universitáriu sira sai ba santuáriu sira ba ema sira ne'ebé iha risku hodi hetan deportasaun ka ne'ebé hasoru diskriminasaun.

SAPO TL ho Lusa - Foto@ Matt Mills McKnight / EPA