DILI,
(ANTIL) – Eis Xefe Casa Sívil Prezidenti Repúblika Taur Matan Ruak,
Fidelis Magalhaes observa, desizaun povu Estadus Unidus Amerika (EUA) hodi hili
Donald Trump nu’udar Prezidenti, Timor mos tenke aproveita liu tan nia
proximidade ho Uniaun Europeia.
“Ita sei la-hatene loos polítika Trump
nian, maibé Timor tenke aproveita liu tan nia proximidade ho Uniaun Europeia
liuhusi relasaun espesiál ho Portugal, relasaun internasionais tama dala ida
tan iha periodu ida nakonu ho incerteza,” Fidelis Magalhaes ba ANTIL bainhira
hasoru malu iha ótel Timor, Kinta, (17/11).
Fidelis
esplika, polítika externa Amerika iha pontu de vista jerál rua
ne’ebé bele esplika pozisaun estadu nian maka liberál no realista. Sira
ne’ebé liberál mak hanesan Prezidente Obama, Clinton no Jimmy Carter. Sira
liberál fiar katak anarkismu iha ordem mundiál ne’e la’ós naturál ho hanoin
úmanu no hakarak liberdade, demokrasia no respeita ba direitus úmanu.
Sira
mos fiar katak EUA iha dever hodi assegura koperasaun multilaterál no ativa iha
mundu globalizado liuhusi koperasaun defeza, ekonomika no promosaun valores
fundamentais ema nian hanesan direitus úmanu no demokrasia.
Maibé
sira ne’ebé komunga prinsípiu realista kontrariu ho liberál sira nia
prinsípiu sira (realista) fi’ar katak ordem mundiál ne’e harii iha anarkismu
nia leten. Tanba ne’e kada nasaun nia dever mak proteze nia sobrevivensia no
aumenta poder militár no ekonomiku hodi bele domina seluk. Sira dala barak
prefere asaun unilaterál.
Bazeia
ba esperensia hirak ne’e, Fidelis hatutan, agora iha Prezidente Donald Trump,
maske agora sei hein hela tanba seidauk dehan se mak atu sai Ministru Negósiu
Estranjeiru no seidauk divulga polítika externa, maibé se haree husi
diskursu durante ne’e, bele antisipa katak sei halo nia polítika tuir
dalan realista nian.
Trump,
Fidelis realsa, preokupasaun prinsipál mak mais empoderamentu ba
kapabilidade militár Amerikanu nian iha planu ekonomiku. “Ha’u hanoin, nia
hanoin atu lori fali Estadus Unidus ba isolamentu no hadook-án hosi
globalizasaun ne’e sei fó perigu boot ba ekonomia mundu nian nomos ba ekonomia
EUA nian rasik,” Fidelis afirma.
Hodi
hatutan, globalizasaun fó mós benefisiu ba ekonomia Amerikanu. “Ha’u la-fiar
nia (Trump) sei bele halo isolamentu ba ekonomia Amerikana ne’ebé opera
ona nivel globál”, katak tan.
Dezafiu
boot liu husi prezidensia Trump nian tuir Fidelis maka sei fó dalan atu
polítika regressiva sira sei buras. Extrema direita, neo-nazis sira mos sei
hetan enerjia foun tanba inspirasaun husi Trump nian prezidensia. “Ha’u hanoin
dezafiu boot liu husi presidensia Trump maka iha nivel valores no prinsípiu”.
Ekonomia
iha rejiaun Azia la-asume responsabilidade hanesan superpotensia ne’ebé
fornese seguransa no koperasaun diplomatika, Xina mak sei assume fali
kna’ar ne’e. Provavelmente Uniaun Europeia mak sei tenta atu kompete ho Xina.
Sujere
atu EUA tenke assegura nafatin platforma ba kooperasaun ekonomika, defeza,
komunikasaun no seguransa. Alende ne’e, EUA tenke mantein relasaun ho Xina. (jornalista:
Manuel Pinto; editora: Rita Almeida)
Foto:
Prezidenti EUA eleitu, Donald Trump. Foto espesiál
Sem comentários:
Enviar um comentário