Parlamentu Europeu husu ba Brazília hodi proteje povu indíjena Guarani-Kaiowá

Parlamentu Europeu (PE) aprova ona, iha loron-kinta ne'e, rezolusaun ida kona-ba situasaun hosi índiu sira Guarani-Kaiowá nian iha estadu brazileiru Mato Grosso do Sul, hodi apela ba autoridade brazileiru sira hodi proteje ema indíjena sira ne'e.

Iha rezolusaun - aprova iha kontestu hosi debate sira kona-ba direitu ema sira nian ne'ebé hala'o iha loron-kinta -, eurodeputadu sira fó hanoin ona katak Konstituisaun brazileiru rekoñese direitu orijinal hosi povu índiu sira ba nia teritóriu ansentral sira.

"Hanesan Estadu nia dever hodi regula no proteje direitu ne'e", hatutan hosi eurodeputadu sira hodi apela ba autoridade brazileiru sira atu garanti realizasaun ba inkéritu independente sira kona-ba atake no asasinatu sira ne'ebé maka povu índiu sira sai beibeik hanesan vítima tanba sira tenta defende sira nia direitu nu'udar ema no defende sira nia teritóriu nian, hodi nune'e responsável sira bele lori ba tribunal.

Kona-ba direitu ba rai, PE husu ba Brazília atu dezenvolve planu ida serbisu nian hodi fó prioridade ba konkluzaun hosi demarkasaun ba teritóriu tomak ne'ebé maka ema Guarani-Kaiowá reklama no harii kondisaun tékniku operasional sira ba asaun ne'e, hodi hanoin katak asasinatu sira akontese tanba vingansa hodi okupa fali rai sira hosi sira nia bizavó nian.

Eurodeputadu sira hatudu mós preokupasaun kona-ba proposta ida hodi muda Konstituisaun ne'ebé maka povu índiu sira "la konkorda tebes" no, karik hetan aprovasaun, "sei ameasa sira nia direitu ba rai sira, permiti atu interese oinseluk sira kontra ema índiu sira, relasionadu ho indústria ai nian, agroindústria, esplorasaun mina sira nian no área enerjia nian, blokeia rekoñesimentu hosi teritóriu foun índiu sira nian".

Iha semana ne'e, ema índiu sira hosi tribu oioin halo manifestasaun iha Brazília hodi protesta hasoru medida balun ne'ebé Governu hosi Prezidente Michel Temer estuda hela.

Iha loron-kinta, polísia uza ona gás pimenta nian hodi impede manifestante na'in 400 resin tama iha anexu ida iha Kámara Deputadu sira nian.

Entre protestu oioin hosi povu índiu sira iha mós protestu hasoru orsamentu boot ba rezerva sira no hakotu lalais prosesu ba demarkasaun rai sira nian.

SAPO TL ho Lusa – Foto: EPA@ Cadu Gomes