DEFENDE ESTADU IHA KONSEITU ESTADU DE DIREITU E

(Refere liu: ba politika uza forsa iha ambitu ezekuta orden komando no papel sidadaun iha estadu de direitu e demokratiku)

Abel Amaral*, opiniaun

Iha biban ida ne’e hau tenta atu kolia kona-ba Defende Estadu de Direitu e Demokratiku refere liu ba buat tolu maka Demokrasia, Direitus Humanus no Lei. Bainhira ita kolia kona-ba Demokrasia ita kolia kona-ba poder, iha nasaun demokratiku ita hotu hatene katak poder mai husi povu tanba povu maka sei hakat sai nia direitu tuir nia vontade rasik liu husi festa demokrasia tuir konstitusaun RDTL haktuir iha artigu 7.1 hateten “Povu halao nia kbit politiku liu husi sufrajiu universal livre, direitu, secretu no periodiku, no liu husi forma seluktan ne’ebé hakerek ona iha lei inan”.

Seluktan molok kolia kona-ba asuntu 3 iha leten, tenta kolia uluk kona-ba Timor Leste, Timor Leste maka estadu ida ne’ebé babain ita bolu Estadu de Direitu e Demokratiku. Liafuan estadu de direitu e demokratiku dalaruma ita konfundi oituan tanba ita hanoin estadu de direitu ne’e maka direitus humanus ne’e. Hanoin hirak ne’e la’os la los maibe persiza hanoin klean tan. Tanba lifuan direitu no direitu humanus koaze atu hanesan maibe labele kaer hanesan. Tanba direitu iha ne’e, iha ninia sintidu rua maka; ida hare liu ba LEI no direitu ida seluk foka liu ba direitu humanus. Nune’e labele kahur sasan, se lae ita hanoin ita nian maka los hela deit maibe ita sala hela. Iha biban ida ne’e hau tenta atu tau diferente entre saida maka Direitu Humanus no saida maka direitu/Lei. Ita kolia kona-badireitus Humanus maka; “oinsa ema bele moris hanesan ema, trata ema hanesan ema no moris ho valor dignidade hanesan ema no ema hotu-hotu iha direitu no dever hanesan”. Kolia kona-ba Direitu ne’ebé liga ba Lei, ne’e ho karakterisku diferente tanba Lei ho nia “karakter represivu/menekan no preventive/ mencegah”. Depois Lei mos iha nia karakter seluk maka Lei ho nia karakter “Obriga ema hotu tenke halo tuir”. Hanoin didiak, ba direitu Humanus, Obriga ema ne’e labele tantu lei mos hanesan, obriga halo tuir lei nee bele. Direitus Humanus iha deit obrigasaun. Dalaruma iha pratika, ita kolia entre direitu no direitu humanus ne’e hanesan tiha deit nune’e ita hare hanesan ema sira haris iha pisina, ida neebe lahatene nani nee hemu bee barak liu duke ida neebe hatene nani.

Hare fila fali Timor Leste iha konseitu Estadu de Direitu e Demokratikia iha ne’e la’os kolia direita kona-ba Direitus Humanus deit maibe persiza hanoin no analiza halo klean, se ita hanoin deit mak direitus humanus mos la’os aat liu maibe la’os diak liu mos. Nune’e hau koko fo nia sintidu tuir buat ne’ebé hau komprende maka hanesan tuir mai “Estadu de direitu maka estadu ida ne’ebé la’o ho Lei, la’o tuir lei/ Negara hukum atau negara berdasarkan hukum, estadu de direitu maka estadu ida ne’ebé ukun tuir lei, estadu ida ne’ebé ema hotu tenke hakruk ba lei, estadu ida ne’ebé ema hotu hanesan iha lei nia oin no estadu ida ne’ebé hala’o vida moris estadu nia tuir prinsipiu legalidade inklui respeitu ba Direitu Humanus. Depois Estadu de Demokratiku maka estadu ida ne’ebé povu maka iha poder ka poder mai husi povu, estadu ida ne’ebé harii husi povu nia hakarak liu husi poder politiku ida ne’ebé tuir prinsipiu demokratiku ninian no prinsipiu hirak ne’e haktuir iha konstituisaun RDTL art.7.1 ne’ebé mensiona iha leten. Estadu de Direitu e Demokratiku mos hatur ona iha konstituisaun RDTL artigu 1.1. ne’ebé hateten “Republika Demokrattika Timor Leste katak estadu ida ne’ebé demokratiku, soberanu, ukun an no ida mesak, hari hosi povu nia hakarak no iha respeitu ba dignidade ema moris ida-ida nian”. Iha mos iha art.2.1 Konstitusaun RDTL hateten, Soberania hatur metin iha povu, ne’ebé hala’o soberania ne’e tuir Lei inan haruka, iha art.2.2 Konstitusaun RDTL mos hateten “Estadu hakruk ba lei Inan no lei oan sira”. Iha konstitusaun RDTL artigu 16.1 hateten “Sidadaun hotu-hotu hanesan iha lei nia oin no iha direitu no obrigasaun hanesan.

Liga nafatin ba estadu de direitu e demokrtiku, hau hakarak liga oituan kona-ba papel sidadaun sira iha estadu de direitu e demokratiku ne’ebé oinsa bele kontribui ba estadu ida ne’e liu-liu ba iha defeza independensia nian, sidadaun hotu -hotu iha obrigasaun no ida ne’e hatur iha Konstituisaun RDTL artigu 49.1 hateten “Sidadaun hotu – hotu iha direitu no dever atu kontribui ba defeza independensia, soberania no integridade teritoriu nasaun nia”. Maibe ita mos labele konfundi ho artigu ida ne’e tanba atu defende estadu, la’os signifika ita hotu-hotu tenke kaer buat kroat ka hotu-hotu tenke kaer kilat, hotu-hotu tenke hatais farda military ka farda polisa nian, ka ba rame-rame halo check point, lae!!. Defende estadu iha ne’e entermu luan katak ita ida-ida tenke iha konsiensia oinsa bele kria moris hakmatek bai ta nia estadu hahu husi ita nia an too iha sosiedade, koopera ho politika estadu nian no tenke halo tuir konseitu estadu de direitu e demokratiku nian. Depois kona-ba atu kaer armas ka kilat, ida ne’e estadu maka iha kompetensia atu fo se no instituisaun ida ne’ebé maka atu bele kaer kilat ka armas hodi defende estadu ida ne’e. Nune’e, iha Konstituisaun RDTL defini ona liu-liu iha konstituisaun RDTL artigu 146.2 hateten “FALINTIL/FDTL garante independensia nasional, integridade territorial, Liberdade no populasaun nia seguransa hasoru agresaun ruma ka ameasa externa, ho respeitu ba orden konstitusional, Tuir fali mai konstituisaun RDTL artigu 147.1 hateten, “Polisia sei defende legalidade demokratiku no garantia sidadaun sira nia seguransa interna, maibe sira labele iha partidu politiku”. Depois atu haklaru kona-ba kompetensia hirak ne’e, Iha konstituisaun RDTL artigu 43.3 hateten “Iha bandu ba asosiasaun ne’ebé ho kroat, asosiasaun militar e paramilitar no organizasaun sira ne’ebé hakarak defende hanoin eh hato’o hahalok ho karakterista ka hasoru ema rai liur eh haburas terorismu”. Nune’e, ita labele konfundi bainhira iha politika estadu bandu ita ne’ebé latemi iha konstituisaun RDTL atu kaer armas(kilat) ka fardas lalika hakfodak tanba lei maka dehan. Purtantu ita konfundi ho papel sidadaun oinsa atu defende estadu iha konseitu estadu de dereitu, konstituisaun RDTL artigu 146 no artigu 147 klaru tiha ona atu oinsa bele fo seguransa maximu ba povu no estadu ida ne’e.

Tuir mai hau liga oituan ba Lei No.5/2017 ne’ebé regularize no kriminaliza ba atividade ba grupu arte marsiais balu no utilizasaun ba armas ninian. Maibe, bainhira lei ne’e promulga, depois iha tan estatementu politika husi superior forsa seguransa nia hodi dehan “Tiru no oho”, Hau rona iha ema balu reasaun hasoru estamentu refere. Ba hau, pesoal fo parabens ba estadu tanba bele produs lei ida ne’ebé atu regularize no kriminaliza hahalok pesoal balu ne’ebé ho karakter krime maibe la’os hahalok ema hotuhotu, lae!!. Tuir mai, buat ida halo reasaun hasoru koalker desizaun politika estadu, ida ne’e maka dehan demokrasia. Tanba iha nasaun demokasia, ita labele simu nonok ba desizaun estadu nia, lae!!, Maibe labele halo reasaun ida dehan rezeita total ba desizau estadu nian tanba iha nasaun demokratiku ne’ebé deit ita bele iha direitu hanesan, ita bele iha lian atu fo hanoin ba estadu, maibe estadu nafatin iha kompetensia aas atu regula nia ema sira. Tanba desizaun politika husi estadu, ida ne’e tuir lei, no estadu maka sei fo kompetensia ba institusaun ida-ida hodi hala’o nia knar tuir lei.

Liga nafatin ho statementu husi superior forsa nia ne’ebé hasai liafuan kona-ba atu Tiru no OHO. Hau nudar ema no sidadaun ida mos bele lasimu liafuan refere maibe bainhira hau rona no koko komprende didiak statementu refere, depois konsulta ho baze legal sira seluk kona-ba politika uza forsa nian, forsa seguransa sira bele uza forsa tuir lei haruka, ne’ebé forsa ne’e uza bainhira atu defende an no defende ema seluk nia vida ka babain ema dehan uza forsa tuir dutrina Proporsionalidade no nesesidade. Maibe iha sorin seluk, hau konkorda reasaun publiku kona-ba lei No.5/2017 tanba autoridade kompetente sira la halo sosializasaun ho diak pa publiku kona-ba lei refere. Ba hau, ita labele fo sala ita nia superior forsa seguransa nian tanba sira, ema ne’ebé atu ezekuta no mantein lei. Diak liu tan ita husu ba estadu liu-liu orgaun kompetente sira atu hakarak ka lakohi, sira tenke halo sosializasaun ba publiku kona-ba lei refere nune’e, sosiedade sira bele iha konhesimentu baziku kona-ba lei ida ne’e.

Lidun seluk kona-ba oinsa no bainhira maka ita nia forsa seguransa sira atu uza forsa iha ambitu atuasaun ba asaun kriminal. Ita hotu konfundi no sempre fo sala ba balu, autoridade forsa seguransa uza forsa ita dehan labele, depois bainhira autoridade seguransa la uza forsa mos labele. Forsa seguransa sir abele uza forsa iha ambite atu defende estadu liu-liu atu defende-an no atu defende ema seluk nia moris. Atu responde duvidas no konfundi hirak ne’e liu-liu kona-bapolitika uza forsa ninia, hau tenta hare konstituisaun RDTL no dekretu lei sira seluk liu-liu dekretu lei sira ne’ebé dekreta konaba forsa seguransa sira nia servisu. Purexemplu kona-ba uza forsa nian, iha Lei Organika PNTL, Dekretu Lei No.9/2009 iha artigu 4 kona-ba uzu forsa nian, iha ne’ebé iha Dekretu Lei No.9/2009 iha artigu 4.1 hateten, “PNTL bele uza forsa bainhira iha perturbasaun/laiha ba orden no trakuilidade/hakmatek publiku, no bainhira laiha meus seluk ne’ebé sufisiente atu hasoru sezistenisa ne’ebé la tuir lei, kontra membru PNTL, bainhira hala’o sira nia funsaun”. Nafatin iha lei refere iha artigu 4.2 hateten “Forsa bele usa deit hodi defende an ka hodi defende ema seluk, hosi hasoru hahalok ne’ebé agresivu no kontra lei ka kontra integridade fizika membru PNTL ka ema sidadaun sira seluk”. Iha artigu 4.3 husi lei hanesan mos hateten “Forsa ne’ebé uza forsa minimu”. Iha lei seluk mos kolia kona-ba Politika uza forsa, Lei Seguransa Nasional nian iha Lei No.2/2010 ne’ebé iha artigu 4.3 hateten “Atividade estadu nian kona-ba seguransa nasional fo vantajen ba prevensaun no diskusaun kona-ba amiasa sira, uzu deit bainhira laiha rezolusaun pasifika ba disputa ka konflitu ruma, no fo vantajen ba uza armamentu ne’ebé la kauza hamate”. Iha Kodigu penal Timor Leste artigu 44 kona-ba Lejítima defeza ne’ebé hateten “Sei konsidera hanesan lejítima defeza ajente nia aktuasaun nesesária atu taka-dalan ba agresaun ilejítima, iminente ka iha ona ezekusaun maibé seidauk hotu, ba ajente ka ema seluk nia interese ne’ebé orden jurídika proteje”. Ho nune’e, atu dehan deit katak lei hirak ne’e fo dalan ba forsa seguransa sira bele uza forsa no forsa hirak ne’e uza tuir nia natureza ka babain dehan tuir dalan proporsionalidade, legalidade, akontabilidade no nesesidade. La’os dehan labele uza forsa.

Lei sira ne’ebe regula konaba uza forsa ninian hateten klaru tebes bainhira maka ita nia forsa rua ne’e bele uza forsa iha ambitu atuasaun kriminal sira. Iha biban ida ne’e mos hau koko atu fo analiza oituan kona-ba politika uza forsa ho nia forma sira liu-liu iha ambitu ezekuta ORDEN ne’ebé mai husi komandante sira. Liafuan Orden tuir buat ne’ebé hau komprende iha nia sintidu rua, liafuan orden ida ho nia sintidu maka “Komanda/Haruka/Orienta no ida fali maka Orden ho lian indonezai dehan ketertiban”. Ita persiza define no halo diferente entre Orden no orientasaun. Orden nee identiku ho instituisaun defeza no seguransa depois orientasaun instituisaun sira neebe la’os military no seguransa. Tanba kada instituisaun iha regras no sira ida-ida dala ruma ho nia termu linguajem rasik. Hanesan lifuan Orden ne’ebé hau hatene, so uza deit iha instituisaun defeza no seguransa nia deit no orden ninia kontiudu ne’e mos tenke tuir instituisaun rua ninia karakter rasik nune’e hakarak ka lakohi kontiudu husi orden ne’e rasik tenke forsa no kroat. Maibe atu ezekuta orden ne’e maka persiza sukat tuir situasaun iha terenu, ida ne’ebé maka ita bele ezekuta no ida ne’ebé mak ita labele ezekuta tanba lei fo dalan tiha ona.

Tanba ne’e, ita labele alerjia ho statement/deklarasaun sira mai husi komandante sira, ita tenke analiza didiak, kuandu temi ona orden klaru nee hatun husi komandante sira tantu polisia ka military no ninia kontidu mos tenke kroat, meik no forsa. Karik ita la’os partensia husi instituisaun rua nee klaru ita tauk. Maibe atu evita husi statement hirak nee, diak liutan ita ida-idak kria situasaun hakamtek, ita tur hakmatek, atividade hotu-hotu halao labele prejudika ema seluk nia direitu no la kontra lei, ita nia forsa rua mos bele iha orden kroat maibe sira mos sei labele ezekuta orden toma-tomak tanba forsa seguransa sira ne’e ema treinadu. Orden bele dehan Tiru ka halo tohar ka seluk – seluktan, sekuandu situasaun iha terenu lapermite sira atu uza forsa, klaru sira mos sei la uza forsa. Seluktan, publiku preukupa ho atuasaun sira ne’ebé ita nia forsa seguransa sira atua ho forsa, iha tempu hanesan hau mos preukupa kona-ba forsa seguransa sira nia seguransa rasik. Dala barak hau hare, membru husi forsa seguransa sira ne’ebé hala’o atividade patrolla no ba halo servisu seguransa nian, sira ba deit ho kilat ka pistola; sira lalori ekipamentu sira seluk ne’ebé atu fo seguru ba sira nia an rasik hanesan ekipamentu ho lian indonezia karik dehan anti huruhara (Tamen/penagkis, sapea besi no selukseluktan). Forsa seguransa sira mos ema, sira ba deit ho isin tanan no lori deit maka kilat ka pistol ita lahatene fatuk ruma katik ka ai ruma katik tidin los sira nia ulun ka isin lolon bele rezulta kanek ou bele rezulta mate, nune’e, dalaruma ita atu hanoin uza forsa tuir proporsional no nesesidade mos ita hanoin barak, nune’e hasoru situasaun fatuk, ai no kroat seluk, bele uza kedang saida maka iha sira nia liman inklui kilat mesmu ninia konsekuensia todan. Kestaun ida nee seriu tebes tanba konsekuensia husi uza forsa makaas liu maka membru husi forsa seguransa bele demite husi nia servisu depois bele tama iha kadea. Estadu tenke hanoin forsa seguransa sira nia seguransa ho didiak tanba sira hala’o misaun atu defende estadu nia direitu maibe estadu fo ekipamentu karik lasufisiente ou karik sira maka la lakohi uza, ida problema.

Tanba ne’e iha biban ida ne’e husu ba estadu atu tau matan ba forsa seguransa sira nia nesesidade liu-liu ekipamentu sira, karik ekipamentu hirak ne’e iha, atu ba hala’o atividade seguransa nia tenke uza, karik seidauk iha komandante sira tenke hato’o ba politiku nain sira, atu nune’e bele tau iha planu orsamentu nian. Se lae, tanba orden husi komandante sira, sira mos nudar ema, ba ezekuta orden maibe sira nia seguransa mos amiasadu, sira bele foti medida ne’ebé maka hakat liu proporsionalidade no nesesidade. Nune’e ita labele duvidas demais kona-ba uza forsa husi forsa seguransa sira tanba uza forsa tuir lei, lei ne’e rasik sei proteje forsa seguransa sira inklui ita hotu maibe bainhira forsa seguransa sira uza forsa la tuir lei maka lei ne’e rasik sei kondena sira inklui ita sira ne’ebé tuda fatuk/ ai ka buat kroat hasoru forsa seguransa no ema seluktan.

Obrigadu e Bem hajam

Autor: Abel Amaral | Agora dadaun Kuliah iha UNPAZ, fakuldade Direitu, servisu iha Fundasaun Mahein | Email: maunabut762003@yahoo.com / abelfundasaunmahein@gmail.com