PD kanditu António Conceição “Kalohan” ba Prezidente

Partidu Demokrátiku (PD) nomeadamente kandidata António da Conceição “Kalohan” ba Prezidente da Repúblika (PR) nu’udár reprezenta jerasaun foun hodi haburas demokrásia iha Timor-Leste.

Prezidente Partidu Demokrátiku, Adriano do Nascimento iha nia diskursu dehan PD hamutuk ho líder istóriku no polítiku lubun ida, veteran, funu na’in, feto faluk no oan ki’ak lubun ida, militantes no simpatizantes Partidu Demokrátiku ho neon laran tomak hili António da Conceição “Kalohan” nu’udár kandidatu atu compete ho kandidatu sira seluk.

“Kompañeiru António da Conceição nu’udár maubere oan no jerasaun Nicolao Lobato ne’ebé pronto atu sakrifika nia-án matrializa mehi família Lobato nian no mehi funu na’in sira seluk katak nasaun ida ne’e nu’udár nasaun soberana no ukun rasik-án,” Adrino Nascimento hato’o kestaun ne’e iha lansamentu kandidatura PD, iha Comoro, Dili, Kinta (02/02/2017).

PD nu’udár dalan ida hodi halo rekrutamentu polítiku ba líder sira hodi hala’o kna’ar iha sistema polítika Estadu nian iha kada orgaun soberanu hanesan Prezidente Repúblika, Primeiru Minístru, Prezidente Parlamentu, Prezidente Tribunal Rekursu, Membru Governu no Parlamentu.

Adriano husu ba kuadrus, militantes no simpatizantes PD nian tomak atu moliza família no ema tomak iha kampaña António da Conceição nian hodi fó mós votus konfiansa ida atu lori jerasaun foun ne’e ba tur iha Palásiu Prezidensiál.

Nu’udár timoroan, Adriano husu ba ema hotu atu fó votus konfiansa ba kandidatura PD nian nune’e bele fó biban ba polítika jerasaun foun atu simu no hatutan polítiku hosi jerasaun tuan sira.

Kandidatu PD, António da Conceição hatete bainhira nia sai duni Prezidente Repúblika hametin relasaun entre líder istóriku sira, sei hakoak ema hotu atu bele dezenvolve ita nia rain.

Hahú iha 2012, líderansa istóriku deklara ba nasaun hahú sistema foun atu hala’o tranjisaun iha nasaun doben Timor-Leste hanesan Xanana maka matadalan ba luta iha rezistensia nian to’o mai prosesu hari’I nasaun.

António dehan nia parte sei garante estabilidade institusionál hotu entre orgaaun estadu nian nune’e povu bele hakmatek. Nia esplika rajaun kandidata-án ba PR hodi fó garante ba líder istóriku sira katak tempu ona atu entrega ba jerasaun foun iha ukun ida ne’e. (Efrem)

Matadalan