Atleta Defisientes Nain 20 Partisipa Paralimpico Iha Malaysia

Atleta defisientes nain 20, kompostu husi feto nain lima no mane nain 15 ba partisipa iha kompetisaun desportu paralimpico iha Malasia fulan Setembru 2017.

Prezidente Komite Paralimpico Nasional Timor-Leste (CPNTL), Julio Sarmento Lopes hateten antes hakat ba iha Malasia atleta sira ne’e iha ona preparasaun ne’ebe diak.

Iha modalidade hat ba atletas Timor-oan sei partisipa inklui mos Boccia, atletismu, tenis meja no badminton.

“Modalidade Boccia ne’e responsablidade husi sponsor rasik, enkuantu modalidade sira seluk ne’e mak responsablidade tomak husi CPNTL nian,” nia hateten, iha Dili.

Kona treinamento ba atleta sira ne’e, nia dehan sira la hela iha asrama, tanba iha mudansa ba iha lideransa (foun).

“Ami konsentradu ba iha treinamentu durante fulan ida resin foin sira hakat ba ne’e,” nia hateten.

Orsamentu sosa hahan ba atleta sira durante iha treinamentu, nia dehan hamutuk $1500-2000, kada atleta nain rua hetan $500 no kada atleta ida mai tuir treinu tenke hetan $5.

Enkuantu kona ba uniforme, nia dehan iha Timor defisil atu sosa entaun ba sosa fali iha Indonezia inklui mos sapatu. No total orsamentu ba eventu ne’e mai husi Sekretariadu Estadu Joventude no Desportu (SEJD) hamutuk $26,450.

“Sira aranka husi Timor dia 17 [Setembru] no semana ida sira sei iha ne’eba no sei fila iha dia 23 fulan ne’e,” nia hateten.

Entretantu atleta defisiente ne’ebe hola parte iha eventu ne’e, Ines Fatima Pires apresia tebes tanba bele hetan oportunidade ida ne’ebe diak hodi bele kompete no hatudu katak ami atleta defisientes bele.

“Hau sente kontente, tanba maske moris ho defisiente maibe ami mos hetan oportunidade hanesan ho sira ne’ebe normal no ami bele ba kompete mos iha nasaun seluk,” nia orgullu.

Celestina Soares, Est | The Dili Weekly