Vendedores Husu Governu Minimiza Importasaun Produtus Husi Rai Liur

Vendedor husi Merkadu Taibesi Osorio Noronha husu ba governu foun mai atu minimiza tiha importasaun sasan produtus husi rai liur hodi valoriza produtus iha rai laran.

Tuir nia maioria populasaun Timor-Leste konsumu produtus husi rai liur ne’ebe importa, enkuantu produtus husi rai laran rasik abandona.

“Husu governu foun mai, tenke tau atensaun ba ida ne’e, tanba kuaze populasuan Timor ne’e konsumu nasuan seluk nian duke ita nia produtus rasik,” nia sujere, iha Dili “Ita nia produtus barak mak soe estraga deit iha merkadu sira ne’e, tanba konsumidor sira ba kompras ladun iha.”

Entretantu tuir Programa Manager organizasaun Permatil, Estanislau Claudio Ximenes katak importante tebes ba governu foun mai atu kria politika diak ida hodi asegura produtus iha rai laran.

“Atu oinsa mak governu bele sosa ita nia produtu rasik, hanesan modo ho aifuan sira ne’ebe iha hodi reduz kustu ba importasuan husi rai liur,” nia sujere. “Ita koalia soberania nasaun independente tenke valoriza no sosa rasik ita nia produtu lokal, neneik redus importasaun husi nasaun seluk kuando governu sosa ona ita nia produtu rasik.”

Tanba tuir nia, ida ne’e hanesan motivasaun diak ida ba agrikultor sira hodi produs produtu rasik hodi mai fa’an iha merkadu, atu nune’e populasaun sira ne’ebe hela iha sidade bele sosa.

Lolita Pacheco, Est | The Dili Weekly